Ключавой тэмай сустрэчы стала перспектыва супрацоўніцтва з вядучымі ВНУ Бразіліі. Цяпер узаемадзеянне ажыццяўляецца па трох дагаворах. У іх ліку пагадненне аб акадэмічным абмене з Федэральным універсітэтам Мінас-Жэрайса, мемарандумы аб узаемаразуменні з гэтай ВНУ і Дзяржаўным універсітэтам Кампінаса. Раней дзейнічалі пагадненні аб культурным, навуковым і акадэмічным супрацоўніцтве з Універсітэтам Бразіліа, аб акадэмічным супрацоўніцтве з Федэральным універсітэтам Параібы, аб супрацоўніцтве з Федэральным універсітэтам Уберландыі.

Найбольш актыўна з пасольствам Бразіліі ўзаемадзейнічае факультэт міжнародных адносін БДУ. З 2000 года на кафедры рамана-германскіх моў міжнароднай прафесійнай дзейнасці вядзецца выкладанне партугальскай мовы, а таксама ёсць абсталяваны кабінет і тэматычная аўдыторыя, аформленая пры падтрымцы пасольства.

«У час перагавораў бакі абазначылі вектары для развіцця і паглыблення дамоўленасцей. У іх ліку абмен студэнтамі, выкладчыкамі і вучонымі, сумесныя навуковыя даследаванні, моўная падрыхтоўка кадраў, распрацоўка праектаў у сферы штучнага інтэлекту, папулярызацыя бразільскай культуры і мастацтва сярод беларускай моладзі. У бліжэйшы час бакі больш дэталёва прапрацуюць ініцыятывы», — праінфармавалі ў БДУ.