Кітайскія ўлады абвясцілі план дзеянняў на 2025 год па будаўніцтве лічбавага Кітая, у якім выкладзены ключавыя ініцыятывы ў такіх галінах, як «Штучны інтэлект (ШІ) плюс», мадэрнізацыя інфраструктуры, індустрыя даных і падрыхтоўка высокакваліфікаваных лічбавых спецыялістаў. Пра гэта паведамілі ў Дзяржаўным упраўленні даных КНР, перадае «Сіньхуа».

План заклікае да прасоўвання рэформ, звязаных з рыначна-арыентаваным размеркаваннем элементаў даных, паскоранаму фарміраванню адзінага нацыянальнага рынку даных, развіццю заснаванай на даных лічбавай эканомікі з улікам мясцовых умоў і ўсебаковаму павышэнню агульнага ўзроўню будаўніцтва лічбавага Кітая.

Згодна з распрацаваным дакументам, да канца 2025 года плануецца дасягнуць істотнага прагрэсу ў пабудове лічбавага Кітая за кошт бесперапыннага нарошчвання прадукцыйных сіл новай якасці ў лічбавай індустрыі, а таксама значна павысіць якасць і эфектыўнасць лічбавага эканамічнага развіцця.

Акрамя таго, план прадугледжвае, што дабаўленая вартасць ключавых галін лічбавай эканомікі перавысіць 10 працэнтаў ад валавога ўнутранага прадукту краіны, і ставіць мэты па дасягненні ўстойлівага прагрэсу ў стварэнні адзінага рынку размеркавання элементаў даных і павелічэнню вылічальнай магутнасці Кітая да больш як 300 эксафлопс.

У плане вызначаны восем асноўных напрамкаў дзеянняў, уключаючы інстытуцыйныя інавацыі, развіццё мясцовых брэндаў і ўкараненне «ШІ плюс».