Біржавыя здзелкі па куплі дзесяці новых відаў сыравіны і інгрэдыентаў былі заключаны ў верасні 2026 года на таргах харчовай сыравінай, бакалеяй і плодаагародніннай прадукцыяй, арганізаваных Беларускай універсальнай таварнай біржай, паведамілі БелТА ў прэс-службе БУТБ.
У прыватнасці, да ўжо прадстаўленага на біржавой пляцоўцы асартыменту дабавіліся такія пазіцыі, як горкі шакалад, грыльяж, гарохавы бялок, харчовы мак, насенне чыя, алівы, каляровая тлушчавая глазура, кансерваваныя грыбы, соль глюкозааміну і сухі яечны жаўток. Праз біржу гэту прадукцыю ўпершыню набылі прадпрыемствы кандытарскай, хлебабулачнай, мясаперапрацоўчай і малакаперапрацоўчай галін.
«Усяго ў верасні бягучага года ў час біржавых гандлёвых сесій па продажы харчовай сыравіны, бакалеі і плодаагародніннай прадукцыі на ўнутраным рынку рэалізавана звыш 180 таварных пазіцый на агульную суму 23 млн рублёў. Найбольшыя аб’ёмы продажаў прыпалі на комплексныя харчовыя дабаўкі, рафінаваны алей, заменнік малочнага тлушчу, закваску глыбокай замарозкі, пальмавы алеін і кандытарскую глазуру. Сукупная ўдзельная вага гэтых відаў прадукцыі ў структуры біржавых здзелак склала 48% у вартасным выражэнні Падставай для арганізацыі і правядзення таргоў новымі таварамі сталі заяўкі на куплю, размешчаныя ў гандлёвай сістэме біржы беларускімі прадпрыемствамі аграпрамысловага комплексу. Прычым, як правіла, пасля заключэння пілотнай здзелкі па той ці іншай таварнай пазіцыі ў далейшым яе закупкі праз біржу становяцца рэгулярнымі. Гэта адна з галоўных прычын дынамічнага развіцця гэтага сегмента біржавога таварнага рынку», — расказалі ў прэс-службе БУТБ.
Па выніках дзевяці месяцаў 2026 года тавараабарот напрамку «Харчовая сыравіна, бакалея і плодаагароднінная прадукцыя» на БУТБ вырас у 1,7 раза да 130,4 млн рублёў. У якасці пакупнікоў здзелкі заключалі 113 арганізацый, а ў якасці прадаўцоў — 195. Для параўнання ў студзені — верасні 2025 года гэтыя паказчыкі складалі 73 і 104 адпаведна.
ААТ «Беларуская ўніверсальная таварная біржа» створана ў 2004 годзе. Першыя таргі адбыліся ў чэрвені 2005 года. БУТБ — адна з буйнейшых таварных біржаў ва Усходняй Еўропе. Яе галоўная функцыя — садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
