Арганізацыя юбілейнай выставы «Белагра» не абышлася без шэрагу асаблівасцей. Па-першае, на гэты раз адна з найбуйнейшых выставачных падзей краіны адбудзецца на новай пляцоўцы Мінскага міжнароднага выставачнага цэнтра, для экспазіцыі выдзелілі на 6660 кв. м больш плошчаў, чым было ў мінулыя разы.

Па-другое, арганізатары інфармуюць аб росце папулярнасці грандыёзнай для Беларусі выставачнай падзеі, што праяўляецца ў павелічэнні колькасці ўдзельнікаў. На ўзроўні афіцыйных дэлегацый, як удакладніў прадстаўнік Мінсельгасхарча, у «Белагра» будуць удзельнічаць больш за 20 краін. Ёсць і навічкі: Батсвана, Гана, Зімбабвэ, Катар, Мазамбік, Рэспубліка Сербская, Боснія і Герцагавіна. У якасці экспанентаў прэзентуюць дасягненні сваёй сельскай гаспадаркі Расія, Германія, Італія, Кітай, Іран, Турцыя, В’етнам, Палесціна, Пакістан, Казахстан, Кыргызстан, Таджыкістан і Узбекістан. Шырокае прадстаўніцтва чакаецца з Расіі: гасцямі «Белагра» стануць 18 рэгіёнаў федэрацыі, 12 выставяць сваю прадукцыю — размова ідзе аб Бранскай, Варонежскай, Ліпецкай, Ніжагародскай, Новасібірскай, Растоўскай, Смаленскай і Чэлябінскай абласцях, Краснадарскім і Пермскім краі, Санкт-Пецярбургу, Ямала-Ненецкай аўтаномнай акрузе.

Прафесійным суправаджэннем выставы стане дзелавая праграма: у час дзесяткаў тэматычных канферэнцый і семінараў будзе абмяркоўвацца шырокае кола пытанняў па забеспячэнню канкурэнтаздольнасці сельскагаспадарчай прадукцыі, развіццю племянной жывёлагадоўлі, удасканаленню сельскагаспадарчага машынабудавання, інтэнсіфікацыі распрацоўкі і ўкаранення тэхналогій для аграрыяў, спыняцца эксперты ў галіне аграпрамысловага комплексу і на перспектывах узаемадзеяння Беларусі з краінамі блізкага і далёкага замежжа.

У большасці сваёй мерапрыемствы «Белагра-2025» могуць зацікавіць спецыялістаў у галіне аграпрамысловага комплексу, аднак арганізатары запэўніваюць, што сумаваць не давядзецца і далёкім ад сельскай гаспадаркі наведвальнікам. Відовішчнымі абяцаюць быць конкурс на лепшага племяннога каня і конкурс прафесійнага майстэрства «Лепшы араты». Не толькі яркім, але і смачным для гасцей «Белагра» стане дэгустацыйны конкурс «Чэмпіён смаку». Шмат цікавых актыўнасцей арганізатары абяцаюць на экспазіцыях «Белферма» і «Рыбацкая вёска», дзе ДА «Белводгас», напрыклад, запросіць на аматарскую рыбалку.

Нагадаем, міжнародная спецыялізаваная выстава «Белагра» ўжо 35 гадоў задае тон у аграпрамысловым свеце і сёлета пройдзе з 3 па 7 чэрвеня на новай пляцоўцы — у Мінскім міжнародным выставачным цэнтры. Арганізатары абяцаюць: гэтая выстава стане самай маштабнай і яскравай за ўсю гісторыю правядзення галоўнага аграпрамысловага форуму краіны. Да ўдзелу ў рамках экспазіцый заявіліся 545 кампаній з розных краін. У праграме — форумы, круглыя сталы, майстар-класы, конкурсы, дэманстрацыі і прэзентацыі, а культурна-відовішчныя мерапрыемствы будуць праходзіць практычна ў рэжыме нон-стоп. Удзельнікі рыхтуюць унікальныя экспазіцыі, пры гэтым праграма выбудавана так, каб аказацца цікавай як дарослым, так і юным наведвальнікам.

У дні яе правядзення з 8.30 да 19.30 з прамежкам у 20 хвілін ад станцый метро «Акадэмія навук» і «Пушкінская» будуць курсіраваць аўтобусы нумар 912 і нумар 962, каб мінчане і госці горада здолелі без цяжкасцей дабрацца да месца правядзення гэтага грандыёзнага мерапрыемства.

Паводле БелТА