Аляксей Казакоў падзяліўся, што кожная экскурсія традыцыйна пачынаецца з візіту ў музей запаведніка, дзе турыстаў знаёмяць з гісторыяй утварэння ўстановы і асаблівасцямі гэтай тэрыторыі. «Мы абавязкова закранаем тэму аварыі на Чарнобыльскай АЭС — без гэтага ніяк. Расказваем пра біяразнастайнасць і даём усю ўступную інфармацыю. У далейшым група перамяшчаецца па асноўных лакацыях», — растлумачыў ён.

Напаўненне маршруту мяняецца ў залежнасці ад пары года. У асенне-зімовы перыяд для турыстаў арганізуюць заезд да спецыяльнай падкормачнай базы для зуброў, якая дае магчымасць убачыць іх з блізкай адлегласці. «Там ёсць цікавы нюанс: уся лакацыя з кармушкамі абгароджана вальерам. Мы заходзім унутр гэтага вальера, а зубры падыходзяць да нас з боку лесу. Так атрымліваецца, быццам зубры прыходзяць паглядзець на нас», — з усмешкай заўважыў спецыяліст.

У летні перыяд падкормачная база не арганізоўваецца, жывёлы харчуюцца самастойна.

Далей шлях экскурсійнай групы праходзіць праз былыя населеныя пункты. Экскурсаводы дэталёва апісваюць побыт мясцовых жыхароў, а таксама храналогію працэсу эвакуацыі людзей. Госці могуць на свае вочы ўбачыць пакінутыя адміністрацыйныя будынкі, школы, дзіцячыя сады і дамы культуры. Захаваныя элементы хатняга ўжытку і пакінутыя дзіцячыя цацкі фарміруюць у візіцёраў моцны эмацыянальны водгук.

Акрамя таго, ён расказаў аб новай лакацыі, якая даўно была цікавая людзям. «Мы арганізавалі аб’ект у тым выглядзе, у якім хацелі. Устанавілі назіральную вышку ў адной з бліжэйшых вёсак, да якой мы можам пад’ехаць у ходзе экскурсіі. З яе бачны новы бяспечны канфайнмент — саркафаг,

пабудаваны ў 2016 годзе над старым аб’ектам „Укрыццё“. Ён карыстаецца вялікай папулярнасцю», — рэзюмаваў Аляксей Казакоў.