Цішыня — залог міру 

Першай па дапамогу звярнулася маладая маці. Жанчына апынулася ў далікатнай сітуацыі: суседка настойліва патрабуе перанесці мыццё на іншы час, сцвярджаючы, што шум пральнай машыны перашкаджае адпачынку. Маладая маці, прызналася, што са з’яўленнем дзіцяці, пральная машына працуе некалькі разоў за дзень.

Яўген Казялецкі растлумачыў нормы заканадаўства: згодна з правіламі, праводзіць работы, якія ствараюць шум і вібрацыю, забаронена з 23:00 да 07:00. У гэты час закон забараняе не толькі гучнае мыццё, але і ігру на музычных інструментах, спевы і гучныя размовы.

«За парушэнне цішыні прадугледжана адказнасць па артыкуле 22.12 КаАП Рэспублікі Беларусь, — папярэдзіў інспектар. — Штраф складае ад 2 да 10 базавых велічынь, а пры паўторным парушэнні — значна больш». Міліцыянер паабяцаў пагаварыць з жыхарамі дома і разабрацца ў сітуацыі.

Небяспечная спадчына

Наступная наведвальніца прыйшла з няпростым пытаннем. Нядаўна ў яе сям’і здарылася гора — памёр дзядуля, заўзяты паляўнічы. Цяпер у хатнім сейфе засталася зарэгістраваная на яго стрэльба, і сваякі асцерагаюцца праблем з законам.

Участковы супакоіў жанчыну, растлумачыўшы алгарытм дзеянняў: аб смерці ўладальніка зброі неабходна неадкладна паведаміць у тэрытарыяльны орган унутраных спраў. Супрацоўнікі міліцыі канфіскуюць стрэльбу на часовае захоўванне да вырашэння пытання аб атрыманні ў спадчыну або ўтылізацыі. Самастойна захоўваць зброю, зарэгістраваную на памерлага чалавека, забаронена.

«Флэт» з наступствамі

Са скаргай на моладзь прыйшоў пажылы мужчына. У яго пад’ездзе пасяліліся студэнты, якія часта ладзяць вечарыны. І хоць музыку яны імкнуцца не ўключаць на поўную моц, жыхароў турбуе іншая праблема — смецце, якое «суседзі зверху» выкідваюць прама з вокнаў. Яўген Казялецкі запісаў даныя кватарантаў і ўзяў сітуацыю на асабісты кантроль.

«З маладымі людзьмі будзе праведзена прафілактычная гутарка, — адзначыў участковы інспектар. — Важна разумець, што выкідванне смецця з вокнаў і падобнае грэбаванне правіламі інтэрната можа быць кваліфікавана не толькі як парушэнне правілаў карыстання жылымі памяшканнямі, але і як дробнае хуліганства. Выкідванне смецця з акна супярэчыць п. 7.6 правілаў карыстання жылымі памяшканнямі (грамадзяне абавязаны выносіць смецце, цвёрдыя камунальныя адходы ў спецыяльна адведзеныя месцы). Згодна з п. 4 арт. 22.12 КаАП Рэспублікі Беларусь парушэнне правілаў утрымання жылых і дапаможных памяшканняў жылога дома цягне штраф да 20 базавых велічынь».

Пастаяннае паўтарэнне сітуацыі са смеццевым пакетам — гэта парушэнне грамадскага парадку і спакою грамадзян, якое выяўляецца ў яўнай непавазе да грамадства. Вінаватага могуць прыцягнуць да адказнасці за дробнае хуліганства (арт. 19.1 КаАП). Яму пагражае ўжо не толькі штраф у памеры да 30 базавых велічынь, але і грамадскія работы, адміністратыўны арышт. Важна: адказнасць надыходзіць з 14 гадоў.

Выкідванне старонніх прадметаў з акна можа прывесці да больш сур’ёзных наступстваў. Напрыклад, «снарад» прызямліцца не на газон, а на прыпаркаваныя аўтамабілі ці людзей, якія ідуць міма (гаворка ж аб выхадзе з пад’езда). Такія дзеянні пацягнуць наступленне крымінальнай адказнасці, у тым ліку за хуліганства, прычыненне цялесных пашкоджанняў, што пагражае пакараннем аж да пазбаўлення волі.

Нагадваем: у сталіцы ўчастковыя інспектары міліцыі па серадах з 17:00 да 20:00 вядуць прыём грамадзян у грамадскіх пунктах аховы правапарадку. Усе ахвотныя могуць звярнуцца да праваахоўнікаў па пытаннях, якія адносяцца да кампетэнцыі органаў унутраных спраў.

Вераніка КАНЮТА
Фота прэс-службы Партызанскага РУУС г. Мінска