Максім Рыжанкоў адзначыў, што беларуска-в’етнамскае стратэгічнае партнёрства сёння ўпэўнена развіваецца. Паміж прэзідэнтамі дзвюх краін склаліся сапраўдная дружба і шчырае разуменне, што дае магчымасць выбудоўваць увесь комплекс адносін у даверным ключы: ад палітычнага да гуманітарнага, ад гандлёва-эканамічнага да культурнага.

Адной з галоўных задач візіту стала выпрацоўка новых прапаноў і ідэй, здольных надаць эканамічнаму супрацоўніцтву больш сур’ёзны імпульс. Размова ідзе перш за ўсё аб пераходзе ад простага гандлю да сумесных праектаў у галіне прамысловай кааперацыі, перапрацоўкі і вытворчасці харчовай прадукцыі з беларускай сыравіны.

Міністр падкрэсліў, што асаблівы ўпор зроблены на работу з рэгіёнамі. «У прысталічным рэгіёне В’етнама мы сустрэліся з губернатарам, прадстаўнікамі кіраўніцтва паветаў і прагаварылі шэраг пытанняў, якія датычацца ўжо канкрэтных рэалізацый праектаў менавіта прамысловай кааперацыі. Тут паспяхова дзейнічае наша зборачная вытворчасць тэхнікі МАЗ. Мы якраз азнаёміліся з бягучым станам спраў. У планах дадаць да будаўнічай пажарную тэхніку, тэхніку ў галіне медыцыны. Акрамя таго, дамовіліся паглядзець на іншыя напрамкі машынабудаўнічага комплексу Беларусі. Нашымі в’етнамскімі партнёрамі ў гэтым рэгіёне выказана зацікаўленасць у вытворчасці сельскагаспадарчай прадукцыі. Мы дамовіліся закласці завод па перапрацоўцы нашай сыравіны і вытворчасці сыроў, масла, сыркоў і іншых відаў малочнай прадукцыі», — удакладніў Максім Рыжанкоў.

Кіраўнік МЗС дадаў, што Паўднёва-Усходняя Азія ў цэлым застаецца для Беларусі вельмі цікавым рэгіёнам з вялікім насельніцтвам і краінамі, якія імкліва набіраюць вагу і штогод прыбаўляюць у чалавечых, прамысловых і навукова-тэхнічных рэсурсах. Беларусь імкнецца тут нарошчваць сваю прамыслова-эканамічную прысутнасць, уключаючы ўзаемадзеянне з такой магутнай краінай, як Інданезія.