Беларусь прапануе перайсці ў рамках Арганізацыіі Дагавора аб калектыўнай бяспецы ад абмеркавання новай архітэктуры еўразійскай бяспекі да распрацоўкі міжнародных прававых дакументаў, якія замацуюць яе асноўныя прынцыпы і ўзаемныя абавязацельствы дзяржаў. Аб гэтым заявіў першы намеснік дзяржаўнага сакратара Савета бяспекі Беларусі Аляксандр Невяроўскі на тэматычнай сесіі «АДКБ у Вялікай Еўразіі: стан і перспектывы» IV Мінскай міжнароднай канферэнцыі па еўразійскай бяспецы, перадае БелТА.
Паводле яго слоў, такія сустрэчы на палях Мінскай канферэнцыі сталі запатрабаванай пляцоўкай для прафесійнага дыялогу, ацэнкі сітуацыі ў зоне адказнасці АДКБ і абмеркавання агульных падыходаў да захавання міру на постсавецкай прасторы і ва ўсёй Еўразіі. «Лічым неабходным у рамках АДКБ пераходзіць ад актыўных дыскусій па фарміраванні новай устойлівай архітэктуры еўразійскай бяспекі да наступнага этапу — перагаворнага працэсу па распрацоўцы міжнародных прававых дакументаў, якія будуць прызначаны замацаваць яе прынцыповыя асновы і ўзаемныя абавязацельствы бакоў», — сказаў Аляксандр Невяроўскі.
Ён падкрэсліў, што Беларусь адкрыта да ініцыятыў іншых дзяржаў — членаў арганізацыі, накіраваных на ўдасканаленне яе дзейнасці. Мінская пляцоўка, на яго думку, можа садзейнічаць умацаванню ўзаемадзеяння і развіццю сістэмы калектыўнай бяспекі.
У ліку прыярытэтаў беларускага парадку дня ў АДКБ Аляксандр Невяроўскі назваў урэгуляванне крызісных сітуацый, недапушчэнне дэстабілізацыі абстаноўкі ў зоне адказнасці арганізацыі, падтрыманне гатоўнасці калектыўных сіл, умацаванне ваенна-тэхнічнага супрацоўніцтва і аналітычнага складніка, а таксама ўзаемадзеянне з міжнароднымі арганізацыямі і трэцімі краінамі.
Каменціруючы журналістам актуальныя пагрозы, прадстаўнік Дзяржаўнага сакратарыята Савета бяспекі звярнуў увагу на складанае становішча па перыметры АДКБ — як на паўднёвым, так і на заходнім напрамку. Паводле яго слоў, важна своечасова сачыць за ўзнікаючымі рызыкамі і прымаць меры, каб не дапусціць крызісаў на тэрыторыі дзяржаў — удзельніц арганізацыі і ў Еўразіі ў цэлым. Асобна ён вылучыў пагрозы ў інфармацыйна-тэхналагічнай сферы.
Сучасныя сродкі камунікацыі могуць выкарыстоўвацца для дэстабілізацыі грамадскага становішча, распаўсюджвання фэйкаў і дыпфэйкаў, кібермахлярства і прапаганды тэрарызму. Гэта выклікі для ўсёй еўразійскай прасторы, падкрэсліў Аляксандр Невяроўскі. Паводле яго слоў, падтрыманне баявой гатоўнасці калектыўных сіл АДКБ застаецца важным складнікам здольнасці арганізацыі абараняць дзяржавы-члены ў выпадку неабходнасці. У якасці прыкладу практычнага прымянення патэнцыялу арганізацыі ён нагадаў аб дзеяннях міратворчых сіл АДКБ у Казахстане.
Аляксандр Невяроўскі выказаў упэўненасць, што чарговая сустрэча ў Мінску будзе садзейнічаць умацаванню супрацоўніцтва паміж дзяржавамі і народамі краін АДКБ і развіццю сістэмы калектыўнай бяспекі.
