Еўрапейскія планетолагі выявілі ў сузор’і Рысі вельмі незвычайную зорную сістэму LHS 1903, структура якой паказвае на тое, што яе сусветы ўзніклі не адначасова, як планеты Сонечнай сістэмы, а паслядоўна, у выніку чаго ўласцівасці некаторых суседніх планет у ёй радыкальным чынам адрозніваюцца, перадае БелТА.
«Можна сказаць, што дадзеная сістэма „вывернутая навыварат“ — звычайна камяністыя планеты не ўзнікаюць на такой вялікай адлегласці ад зорак. Па ўсёй бачнасці, апошняя планета гэтай сістэмы сфарміравалася значна пазней за іншыя яе сусветы, калі запасы газу ў протапланетным дыску былі вычарпаныя», — растлумачыў дацэнт Уорыкскага ўніверсітэта Томас Уілсан, чые словы прыводзіць прэс-служба ВНУ.
Як тлумачаць планетолагі, у адпаведнасці з агульнапрынятымі тэорыямі фарміраванне планет вакол зорак пачынаецца прыкладна ў адзін і той жа час, прычым іх склад, памеры і структура залежаць ад таго, у якіх рэгіёнах протапланетнага дыска яны ўзніклі. Аналагі Зямлі ўзнікаюць у блізкіх да зоркі частках гэтай структуры, адкуль свячэнне зоркі паспела выпарыць большую частку лятучых рэчываў, тады як газавыя гіганты фарміруюцца на халодных ускраінах протапланетных дыскаў, дзе захоўваюцца шырокія запасы лёду.
Еўрапейскія планетолагі выявілі патэнцыяльна першы прыклад таго, што гэта правіла можа не выконвацца, назіраючы пры дапамозе арбітальнага тэлескопа CHEOPS за чырвоным карлікам LHS 1903, які размешчаны ў сузор’і Рысі на адлегласці ў 4,2 тыс. светлавых гадоў ад Зямлі. У ваколіцах гэтага невялікага свяціла даследчыкі выявілі чатыры планеты: «суперзямлю» ў бліжэйшых ваколіцах зоркі, два невялікія газавыы гіганты, размешчаныя крыху далей, і яшчэ адну буйную камяністую планету на вялікай адлегласці ад LHS 1903.
