У міліцыі Гродна нагадалі аб тым, як бяспечна паводзіць сябе на адпачынку каля вады. Там расказалі, што рабіць не трэба, а што і зусім забаронена законам.
Так, заплываць за буйкі і падплываць да плаўсродкаў можа быць небяспечным мерапрыемствам, таксама як скачкі ў ваду з катэраў, лодак і прычалаў. Не трэба плаваць на дошках, бярвеннях, ляжаках, аўтамабільных камерах і надзіманых матрацах.
А вось за купанне ў забароненых месцах ужо можна панесці адміністрацыйную адказнасць па арт. 24.42 КаАП Беларусі — штраф ад 1 да 3 базавых велічынь (ад 42 да 126 рублёў).
Купанне п’яным — таксама дрэнная ідэя. За распіццё алкаголю і з’яўленне ў грамадскіх месцах у п’яным выглядзе можна заплаціць да 8 базавых (336 рублёў).
Ну і памятайце пра забарону на развядзенне вогнішчаў у забароненых месцах (арт. 16.41 КаАП) — штраф да 12 базавых велічынь (504 рублі).
