«Беларускі і грузінскі кінематограф, як і любы іншы кінематограф у свеце, адрозніваюцца адзін ад аднаго тым жа, што і людзі, тым, чым адрозніваецца грузін ад беларуса, грузін ад немца або беларус ад немца. Кіно — гэта жывы арганізм, якія мысліць, і не толькі мысліць, але і адчувае. А адрознівае нас перадача гэтых пачуццяў, форма, у якой мы гэта робім», — сказаў Давіт Гуджабідзэ.

Сёння ён правёў майстар-клас для студэнтаў у Беларускай дзяржаўнай акадэміі мастацтваў, дзе падзяліўся тым, чаму любіць кіно і як яго разумее, а таксама паказаў фрагмент свайго фільма. «Я назваў гэты майстар-клас „Эфект нечаканасці“. Праўда — такі набор пэўных рэчаў, якія мы лічым правільнымі. Але ісціна — набор гэтых праўд з рознага боку, таму што яна шырэйшая і глыбейшая за праўду. Адказам на пытанне, хто і якую ісціну знайшоў, і ацэньваецца работа і рэжысёр», — дадаў кінааператар.

На яго думку, важную ролю ў кінематографе адыгрываюць эмоцыі. Гледачу падабаецца пазнаваць нешта новае, бачыць нешта вядомае з незвычайнага боку. Менавіта гэтым тлумачыцца такая колькасць рэмейкаў, якую мы бачым на нашых экранах.

«За гады педагагічнай практыкі, якую я вяду з вельмі даўніх часоў, я зразумеў, што лепшая лекцыя — паказ, як гэта рабіць. Асабліва для маладога кінематаграфіста важна вучыцца на пляцоўцы. Гэта праверка на прыналежнасць чалавека да свету кіно. Калі чалавек прыйшоў на пляцоўку і там застаўся, то ён кіношнік, а калі прыйшоў і пайшоў, трэба шукаць іншае поле дзейнасці, і гэта правільна», — рэзюмаваў Давіт Гуджабідзэ.

XXXII Мінскі міжнародны кінафестываль «Лістапад» праходзіць у Беларусі з 30 кастрычніка па 6 лістапада пад лозунгам «Глядзі. Жыві. Цані». Для ўдзелу ў фестывалі было пададзена больш за 3,3 тыс. заявак са 108 краін, адабрана 130 фільмаў з 55 краін. На «Лістападзе» традыцыйна прадстаўлены фільмы з Расіі, Кітая, Індыі, Ірана, Пакістана, В’етнама. Таксама будуць работы з Камбоджы, Марока, Венесуэлы, Танзаніі, Калумбіі, ЗША і іншых краін.