М’янма гатова актыўна развіваць кантакты з Беларуссю ў адукацыі, турызме і банкаўскай сферы. Аб гэтым заявіла журналістам міністр інвестыцый і знешнеэканамічных адносін Рэспублікі Саюз М’янма Ва Ва Маун па выніках праведзенага ў Мінску другога пасяджэння сумеснага беларуска-м’янманскага камітэта па гандлёва-эканамічным супрацоўніцтве, паведамляе БелТА.
«На пасяджэнні сумеснага камітэта размова ішла аб узаемадзеянні ў сферы адукацыі. Мы гатовы супрацоўнічаць з беларускімі ВНУ і правесці абмены паміж універсітэтамі, у тым ліку навуковымі спецыялістамі», — сказала міністр.
«Мы маем намер ажыццяўляць дасягнутыя дамоўленасці аб кантактах у сферы турызму і хацелі б запрасіць беларускіх турыстаў у М’янму. У нас прыгожыя пляжы і шмат розных славутасцяў. Абмяркоўвалася і магчымасць прамых авіярэйсаў паміж М’янмай і Беларуссю», — дадала Ва Ва Маун.
Акрамя таго, паводле слоў міністра, было ўзгоднена ўзаемадзеянне ў банкаўскай і фінансавай сферах, паміж дзелавымі коламі, у тым ліку паміж БелГПП і м’янманскімі калегамі. Ва Ва Маун таксама расказала аб узгадненні дарожнай карты супрацоўніцтва паміж дзвюма краінамі для рэалізацыі сумесных праектаў.
