Калі наймальнік просіць перавесціся ў іншы населены пункт ці вы згаджаецеся на вакансію ў іншым горадзе, па законе вам належаць не толькі пад’ёмныя, але і кампенсацыя за пераезд, правоз рэчаў і нават сутачныя. Адвакат Святлана Басалай патлумачыла, на што менавіта могуць разлічваць работнікі і ў якіх выпадках грошы давядзецца вярнуць, перадае mlyn.by.
Што ўваходзіць у кампенсацыі
Згодна з артыкулам 96 Працоўнага кодэкса, калі вы пераязджаеце ў іншую мясцовасць у сувязі з пераводам або прыёмам на працу, наймальнік абавязаны аплаціць:
-
Праезд — вам і членам вашай сям’і (білеты туды, дзе будзеце працаваць і жыць);
-
Перавозку рэчаў — да 500 кілаграмаў на самога работніка і да 150 кілаграмаў на кожнага члена сям’і. Перавозка аплачваецца чыгуначным, водным або аўтамабільным транспартам агульнага карыстання;
-
Сутачныя — за кожны дзень у дарозе. Памеры такія ж, як пры службовых камандзіроўках.
Аднаразовая дапамога (пад’ёмныя) — яе памер залежыць ад акладу. Самому работніку выплачваюць месячную тарыфную стаўку (аклад) па новым месцы працы. На кожнага члена сям’і, які пераезджае, дадаюць яшчэ чвэрць ад гэтай сумы.
Важны нюанс пра сям’ю
Выплаты на членаў сям’і (праезд, правоз рэчаў і пад’ёмныя) належаць толькі ў тым выпадку, калі яны пераязджаюць на новае месца жыхарства работніка на працягу года з таго дня, як ім фактычна далі жыллё.
Калі пераводзіцеся на тэрмін да года
Бывае, што работніка адпраўляюць у іншы горад на часовую працу (не больш чым на год) і сям’я з ім не едзе. У такім выпадку па дамоўленасці з наймальнікам можна атрымаць кампенсацыю за пражыванне на новым месцы. Але ёсць абмежаванне: гэта сума не павінна перавышаць палову памеру сутачных.
Усе гэтыя выдаткі бярэ на сябе той наймальнік, да якога пераводзіцца або прымаецца работнік.
Калі грошы прыйдзецца вярнуць
Закон прадугледжвае сітуацыі, калі атрыманыя кампенсацыі трэба вяртаць назад. Гэта адбудзецца, калі работнік:
-
без уважлівай прычыны не выйшаў на працу або адмовіўся прыступаць да абавязкаў;
-
звольніўся да заканчэння тэрміну працы, які быў абумоўлены пры пераводзе (калі тэрмін не ўстанаўлівалі — то да заканчэння аднаго года працы). Пры гэтым звальненне павінна быць па ўласным жаданні без уважлівай прычыны або за вінаватыя дзеянні (напрыклад, прагул);
-
быў звольнены за вінаватыя дзеянні.
Калі ж работнік не з’явіўся або адмовіўся працаваць па ўважлівай прычыне, ён абавязаны вярнуць толькі частку грошай, за выключэннем ужо патрачаных на дарогу.
