Як удакладнілі ў дзяржаўнай гісторыка-культурнай установе, падзею падрыхтавалі разам з выкладчыкамі і навучэнцамі Гомельскага дзяржаўнага каледжа мастацтваў імя М. Ф. Сакалоўскага — адной з найстарэйшых музычных устаноў Беларусі, якая адзначае сёлета 105-годдзе.

«Надыходзіць той самы вечар, калі варта перастаць круціцца як вавёрка ў коле паўсядзённых спраў і клопатаў і замест гэтага плаўна, як пялёстак квітнеючай яблыні, закружыцца ў дзіўным мікракосмасе мудрагелістых сілуэтаў, чароўных гукаў музыкі і сагравальных эмоцый. Наша музейнае кола не імчыцца за мітуснёй — наадварот, яно апісвае кругі павольна, як сонца ў небе, каб даць нам магчымасць запаволіцца, заўважыць тысячы дэталяў, якія выслізгваюць: някідкае хараство беларускага пейзажу на карціне часовай экспазіцыі «Каб адчуваць», загадкавыя літары на старадаўняй цагліне на выставе «З чаго гэта пабудавана», іскру святла, што затаілася ў глыбіні шкляной пацеркі на праекце «Тэрыторыя спадчыны. Радзімічы», — расказалі пра праграму ў палацы. 

Па словах арганізатараў, менавіта з гэтых маленькіх дэталяў складваюцца вобразы вялізнага значэння. «Дома, у якім жывём, зямлі, на якой выраслі, гісторыі, у якую сыходзяць нашы карані. Сваё, блізкае, патаемнае ў мастацтве, як і ў жыцці, з’яўляецца адпраўным пунктам, надзейнай гаванню і жаданым завяршэннем любога падарожжа, а па-сапраўднаму наватарскія, неардынарныя, смелыя формы і рашэнні нараджаюцца толькі пры асцярожным пераасэнсаванні каласальнага вопыту, які дастаўся нам у спадчыну ад папярэднікаў», — падкрэслілі ў дзяржаўнай гісторыка-культурнай установе. 

У Палацы зрабілі акцэнт: «АРТ-Кола» — гэта падарожжа скрозь мінулае ў сучаснасць, погляд не на мастацтва, а ў мастацтва, даследаванне таго, што ляжыць у яго аснове. «Ад харэаграфічнага спектакля, які спалучае самабытныя элементы нацыянальнай культуры з сучаснымі пластычнымі вобразамі (рэжысёр — Валянцін Ісакаў) да мелодый цымбалаў, якія адгукаюцца ў самай глыбіні сэрца, у Калоннай зале. Ад творчага пошуку праз бясконца зменлівыя формы (мастак па пяску Юрый Пташынскі) да культурных канстант векавых народных промыслаў (інтэрактыўная зона „Кола майстроў“). Ад арнаментаў на далятапіснай кераміцы да алегарычных шматслойных кампазіцый беларускіх мастакоў XXI стагоддзя. Варта толькі прыгледзецца — усюды прачытваецца код нашай ідэнтычнасці, і кожны „арт“ раскрываецца Адвечным, Родным, Традыцыйным», — звярнулі ўвагу ў палацава-паркавым ансамблі. 

Усіх ахвотных запрашаюць паглыбіцца ў «Ноч музеяў — 2026» у магію сузірання культурнай спадчыны, разгадваючы загадкі, гуляючы ў музейныя гульні, знаёмячыся з унікальнымі артэфактамі і выставачнымі праектамі. «У гэтую ноч у Чырвонай гасцінай будзе экспанавацца адзін з найкаштоўнейшых рарытэтаў палацавага збору — дыплом І. Ф. Паскевіча на прысваенне яму звання фельдмаршала аўстрыйскіх войскаў з асабістым подпісам імператара Франца Іосіфа I. А ў зале другога паверха пачне работу часовая экспазіцыя «Клоўны: гісторыя адной калекцыі», якая прадстаўляе ўвазе гасцей непараўнальную трупу артыстаў з керамікі, фарфору, шкла і тэкстылю — статуэткі і лялькі клоўнаў са збору Заслужанага дзеяча культуры Рэспублікі Беларусь Я. М. Лабовіча», — дадалі ў палацы. 

«Ноч музеяў — 2026: АРТ-Кола» будзе доўжыцца з 19.00 да 22.30.