Дырэктар ТАА «Цэнтр адытыўных тэхналогій РН» Дзяніс Рагачоў лічыць: адытыўныя тэхналогіі з’яўляюцца не альтэрнатывай класічнаму ліццю і парашковай металургіі, а іх дапаўненнем, шляхам да адкрыцця новых магчымасцяў. На яго думку, відавочная выгада 3D-друку пры вырабе адзінкавых або дробнасерыйных вырабаў. Прамысловы прынтар друкуе выраб з чарцяжа, адсутнічае працаёмкі падрыхтоўчы этап, як у традыцыйных тэхналогіях ліцця: распрацоўка і выраб прэс-формы, налада ліццёвай машыны, кантроль адпаведнасці гатовага вырабу зададзеным параметрам. Гэтыя выдаткі могуць значна павялічваць кошт дробнасерыйных вырабаў. Адытыўныя тэхналогіі выігрываюць і па хуткасці.

Праект па стварэнні ўчастка адытыўных тэхналогій цяпер рэалізуецца на МАЗе. Па словах дырэктара навукова-тэхнічнага цэнтра — галоўнага канструктара завода Андрэя Саўчыца, з дапамогай 3D-друку ствараюцца дэталі і абсталяванне для доследных узораў тэхнікі. Сёлета МАЗ стаў уладальнікам абсталявання, якое дазваляе метадам адытыўных тэхналогій вырабляць буйнафарматныя фрагменты. За кошт скарочанага тэхналагічнага ланцужка істотна зніжаюцца выдаткі і тэрміны вырабу. У выніку прадпрыемства выходзіць на 6-месячны вытворчы цыкл — ад пачатку праектавання да дэманстрацыі новага ўзору.

Сёння спецыялісты прадпрыемства працуюць над інжынернай канцэпцыяй пасажырскага беспілотнага шатла для аэрапортаў. Мяркуецца, што маналітная канструкцыя кузава будзе цалкам надрукаваная на 3D-прынтары з аднаго-двух праходаў. За кошт гэтай тэхналогіі плануецца забяспечыць апорную здольнасць транспартнага сродку і трываласць, якая неабходна для бяспекі пасажыраў. Пры традыцыйнай вытворчасці ў пасажырскай тэхніцы выкарыстоўваюцца звычайна стандартныя профілі. У сваю чаргу адытыўныя тэхналогіі дазваляюць задаваць будучаму вырабу любыя складаныя формы, што робіць дызайн значна больш арыгінальным.

Акрамя непасрэдна вытворчых фактараў, укараненне ў прамысловасць інавацыйных тэхналогій цесна звязана са стандартызацыяй падыходаў да іх выкарыстання. Як праінфармаваў намеснік старшыні Дзяржаўнага камітэта па стандартызацыі Іван Кісленка, з улікам інтарэсаў айчыннай прамысловасці ўжо ўведзена 16 стандартаў Расійскай Федэрацыі. Праграмай апераджальнай стандартызацыі ў прыярытэтных сферах эканомікі да 2029 года прадугледжана распрацоўка яшчэ 10 стандартаў. У найбліжэйшы час распачне сваю дзейнасць тэхнічны камітэт па адытыўных тэхналогіях. Павінен быць сфармаваны паняційны апарат, а таксама патрабаванні да выпрабаванняў, бяспекі і якасці прадукцыі, вырабленай метадам 3D-друку.

Таццяна ШЧАДРАНОК