Кіраўнік дзяржавы акцэнтаваў увагу на тым, што некалькі дзён таму заслухаў даклад старшыні Брэсцкага аблвыканкама. Прэзідэнт пацікавіўся, якая сітуацыя зараз. «У вас менш за ўсё дажджоў цяпер праходзіць, нічога не перашкаджае вам убіраць. Як справы?» — спытаў Аляксандр Лукашэнка.

Паводле слоў Пятра Пархомчыка, у паўднёва-заходнім рэгіёне завяршылі ўборку ячменю. Намалочана 160 тыс. т пры ўраджайнасці 47,1 ц/га. Гэта на 1,8 ц/га больш за ўзровень мінулага года. «У цэлым убрана 22% плошчаў збожжавых. Намалочана 307 тыс. т пры ўраджайнасці 41,1 ц/га. Салома ўбрана на 57% плошчаў. Азімы рапс убраны на 66% плошчаў, намалочана 147 тыс. т пры ўраджайнасці 30,6 ц/га. Гэта вышэй за ўзровень мінулага года на 4,6 ц/га», — расказаў старшыня Брэсцкага аблвыканкама.

На Брэстчыне церабленне лёну праведзена на 80%. Да 1 жніўня гэту работу завершаць. Таксама ў рэгіёне пачалі пастаўкі ў лік дзяржзаказу піваварнага ячменю, збожжа (жыта, пшаніца). «Дзяржзаказ будзе выкананы ў поўным аб’ёме», — запэўніў Пётр Пархомчык.

Гаворачы аб кадрах, ён звярнуў увагу, што дадаткова ў дапамогу аграрыям прыцягнута 412 механізатараў, у тым ліку 237 камбайнераў. «З іх 54 — практыканты, выпускнікі вышэйшых навучальных устаноў, прадстаўнікі прамысловых арганізацый (227). Дзякуй сілавікам: МНС — 33 чалавекі, МУС — 31. Ва ўборцы будуць удзельнічаць прыкладна 106 сямейных экіпажаў і, вядома, наша моладзь — у межах 111», — пералічыў кіраўнік Брэсцкай вобласці.

У рэгіёне ва ўборцы і дапрацоўцы збожжа будуць задзейнічаны 1323 камбайны. Было набыта 98 новых. Чакаецца пастаўка яшчэ сямі. Нагрузка на 1 камбайн складае 260 га. На жніве таксама задзейнічалі дзевяць атрадаў камбайнаў райаграсэрвісаў.

«Пытанняў, якія патрабуюць рашэнняў на ўзроўні кіраўніка дзяржавы, няма. Гатовы выканаць пастаўленыя задачы і не дапусціць зніжэння вытворчасці культур да ўзроўню мінулага года», — падкрэсліў старшыня Брэсцкага аблвыканкама.

Аляксандр Лукашэнка, заслухаўшы даклад, нагадаў, што ў бліжэйшы час мае намер наведаць Брэсцкую вобласць.