Як расказаў афіцыйны прадстаўнік УСК па Брэсцкай вобласці Раман Зармаеў, паводле звестак следства, 23 верасня 69-гадоваму жыхару Брэста патэлефанавалі ў месенджары незнаёмыя. Прадставіўшыся супрацоўнікамі праваахоўных органаў, яны пераканалі пенсіянера ў неабходнасці «задэклараваць» усе наяўныя грашовыя сродкі.

Ахвяра зламыснікаў, паддаўшыся на ўгаворы, сфатаграфавала грошы і адправіла здымкі махлярам. Пасля гэтага мужчына перадаў «кур’еру», які прыбыў да яго дамоў, усе зберажэнні на суму больш за 108 тысяч еўра, якія прызначаліся для куплі кватэры.

Неўзабаве супрацоўнікі міліцыі затрымалі падазраванага. Ім аказаўся 32-гадовы мясцовы жыхар. Аднак ён паспеў перадаць выкрадзеную замежную валюту наступнаму звяну злачыннага ланцуга.

Падчас следства ўстаноўлена, што 19 верасня сам затрыманы стаў ахвярай кіберзлачынцаў і перавёў ім каля 26 тысяч рублёў. Калі мужчына зразумеў, што яго падманулі, ашуканцы прапанавалі «падпрацоўку кур’ерам», каб кампенсаваць страту. Жыхар Брэста атрымаў ад двух пацярпелых больш за 20 тысяч рублёў і залічыў на ўказаны аферыстамі рахунак.

Брэсцкім міжраённым аддзелам Следчага камітэта распачата крымінальная справа па ч. 4 арт. 209 (махлярства, учыненае ў асабліва буйным памеры) Крымінальнага кодэкса.

Цяпер па крымінальнай справе праводзяцца следчыя дзеянні і аператыўна-вышуковыя мерапрыемствы, накіраваныя на ўстанаўленне і затрыманне ўсіх тых асоб, якія маюць дачыненне да гэтага злачынства, уключаючы кібермахляроў і «кур’ера», а таксама на кампенсацыю прычыненага ўрону.