Святлана Якубоўская адзначыла, што акне — гэта хранічнае скурнае захворванне, якое могуць дыягнаставаць не толькі ў падлетка, але і дарослага чалавека, нават ва ўзросце 30-40 гадоў. 

— Велізарную ролю ў развіцці гэтага захворвання адыгрывае спадчыннасць. Але тады ўзнікае пытанне, чаму ў падлеткавым узросце не было такіх высыпанняў, а ў 30 гадоў яны з’явіліся? Існуюць дадатковыя фактары, якія могуць справакаваць развіццё і праяву гэтага скурнага захворвання. Можа, вы перажылі моцны стрэс або быў гарманальны дысбаланс, цяжарнасць, роды. Можа, вы няправільна даглядаеце скуру, у халодную пару года выбралі вельмі тлусты крэм. Або, напрыклад, сталі прымаць нейкія лекавыя прэпараты. Фактараў і трыгераў даволі шмат, — расказала спецыяліст.

Калі вы сутыкнуліся з такой праблемай у дарослым узросце, варта звярнуцца да дэрматолага. Пры неабходнасці ён прызначыць дадатковае абследаванне. 

— Лячэнне залежыць ад ступені цяжкасці. Калі гэта камедоны, папулы, пустулы і іх няшмат, урач падбярэ граматны догляд, а таксама можа парэкамендаваць вонкавыя лекавыя прэпараты ў выглядзе раствораў, геляў. Калі гэта не дапамагае ці высыпанняў даволі шмат, можа быць рэкамендавана камбінацыя вонкавага лячэння з прыёмам лекавых прэпаратаў ўнутр. Як правіла, гэта антыбактэрыяльныя прэпараты, якія прызначаюцца курсам. Калі і гэта не дапамагло або, дапусцім, у вас цяжкае цячэнне акне, рэзкае яго развіццё, досыць буйныя элементы, якія закранаюць не толькі твар, але і плечы, грудзі, спіну, можа быць рэкамендавана сістэмная тэрапія рэтыноідамі, — патлумачыла Святлана Якубоўская.

Яна падкрэсліла, што такое лячэнне прызначае выключна спецыяліст.

— Лячэнне рэтыноідамі займае ад 6-7 месяцаў і нават больш. Пры гэтым неабходна здаваць аналізы, — дадала спецыяліст. — Таму, калі вы сутыкнуліся з такой праблемай, як акне, трэба ісці да ўрача, разбірацца ў прычынах і, вядома, набрацца цярпення, таму што працэс лячэння даволі доўгі.