Пра тое, што правакуе атлусценне ў дзяцей і як яго пазбегнуць, расказалі эксперты падчас круглага стала ў НДІ гігіены, таксікалогіі, эпідэміялогіі, вірусалогіі і мікрабіялогіі Рэспубліканскага цэнтра гігіены, эпідэміялогіі і грамадскага здароўя, перадае БелТА.
Урачы расказалі, што, згодна з даследаваннямі рацыёну пяцікласнікаў, у суадносінах бялкоў, тлушчаў і вугляводаў пераважае тлушчавы кампанент, а колькасць простага цукру перавышае норму.
Наступны важны момант — харчовыя звычкі. Вялікая група дзяцей спажывае газіраваныя напоі і цукеркі практычна кожны дзень, не есць садавіну і гародніну штодня. Даследаванні кажуць, што 18% дзяцей або ніколі не снедаюць, або снедаюць адзін-два разы на тыдзень. На думку экспертаў, калі дзіця не будзе снедаць дома, то з вялікай верагоднасцю з’есць булачку, любы не карысны перакус. Школа павінна быць той прасторай, дзе дзяцей вучаць правільным смакавым перавагам.
Рухальная актыўнасць павінна займаць у дзяцей каля 60 хвілін у дзень. З гэтым могуць дапамагчы ўрокі фізкультуры некалькі разоў на тыдзень. Школьнікаў спыталі: ці падабаецца ім наведваць урок фізкультуры, каля 80% адказалі так, астатнія 20% спасылаюцца на нецікавае заданне і нуду. Таму вельмі важна працаваць з праграмамі.
Таксама ў хлопцаў і дзяўчынак пацікавіліся, чым яны занятыя на перапынках. Аказалася, толькі невялікі працэнт з іх бегае, гуляе. У асноўным яны кантактуюць з сябрамі, робяць хатняе заданне. Даследаванні кажуць: там, дзе праводзяцца фізкультхвілінкі, стомы ў дзяцей значна менш.
Яшчэ адзін важны момант — дадатковая рухальная актыўнасць, то-бок наведванне секцый. Розныя віды адзін-два разы на тыдзень наведваюць каля 20% дзяцей.
Эксперты прапануюць бацькам прывучыць дзяцей выкарыстоўваць спецыяльныя лічбавыя дадаткі, з якімі яны змогуць рухацца і захоўваць здароўе. Таксама рэкамендуецца не даваць школьнікам вялікую колькасць хатняга задання, на якую яны выдаткоўваюць шмат часу і доўга сядзяць. Важна, каб дзеці былі 3 гадзіны ў дзень на свежым паветры. Медыкі адзначаюць, што гэтую норму выконвае толькі 15% школьнікаў у працоўныя дні. У выхадныя гэтая лічба большая.
Дзеці досыць доўга сядзяць за камп'ютарамі, у працоўныя дні гэта звязана з навучальным працэсам, а ў выхадныя — з гульнямі. Таксама ўплывае рэжым сну — час адпачынку і яго працягласць. Са слоў спікераў, многія спяць менш за 7 гадзін нават у выхадныя дні.
Таксама сярод мер прафілактыкі — інфармацыйныя, адукацыйныя мерапрыемствы, навуковыя даследаванні, маніторынг, стварэнне падтрымліваючага асяроддзя.
