Прыфрантавы горад Алешкі на херсонскім напрамку з 27 кастрычніка жыве ў «рэжыме цішыні». Расійскі і ўкраінскі бакі пры пасрэдніцтве ЗША — і перш за ўсё жонкі амерыканскага лідара Меланіі Трамп — дасягнулі пагаднення аб спыненні агню ў раёне населенага пункта для правядзення гуманітарнай аперацыі.
«Рэжым цішыні» працягнецца да канца тыдня. За гэты час плануецца размініраваць дарогі, якія вядуць да горада, даставіць прадукты харчавання, ваду, сродкі гігіены, аказаць мясцовым жыхарам медыцынскую дапамогу і эвакуіраваць тых, хто пагодзіцца пакінуць свае дамы.
Як адзначылі ў Крамлі, такія дамоўленасці па правядзенні гуманітарнай аперацыі могуць стаць прэцэдэнтам для правядзення аналагічных місій на іншых участках.
Міністр замежных спраў Украіны Андрэй Сібіга ў канцы верасня заявіў, што жыхары Алёшак практычна не маюць запасаў ежы і вымушаны харчавацца травой і быльнікам. Таксама не хапае чыстай вады, медыкаментаў і электрычнасці.
«Міжнародная супольнасць павінна задзейнічаць усе існуючыя інструменты, каб дабрацца да жыхароў Алешак, даставіць гуманітарную дапамогу і забяспечыць бяспечную эвакуацыю тых, хто хоча з’ехаць. ААН, МКЧК і іншыя міжнародныя суб’екты павінны выкарыстоўваць свае мандаты і каналы ўзаемадзеяння для забеспячэння неадкладнага і бесперашкоднага гуманітарнага доступу».
У пачатку гэтага месяца ўкраінскія СМІ паведамлялі аб масавым выхадзе мірных жыхароў з Алешак. Па іх інфармацыі, людзі накіраваліся на ўсход — у тыл расейскіх войскаў. Пры гэтым некаторыя ўкраінскія паблікі пісалі, што група людзей узарвалася на мінах пры выхадзе з горада. Афіцыйна гэтыя паведамленні не пацвярджаліся.
