Брытанская спартсменка прыбыла ў Польшчу, каб выступіць на чэмпіянаце свету. Аднак планы ледзь не парушыліся яшчэ на ўваходзе. Польскі партал Onet назваў тое, што адбылося «сапраўдным кашмарам», адзначыўшы, што супрацоўнікі аэрапорта «не праявілі міласэрнасці» да лёгкаатлеткі.

Прычынай затрымання сталі трэніровачныя шыпаваныя красоўкі — звычайная экіпіроўка для бегу па спецыяльных дарожках. Але ў аэрапорце металічныя шыпы абвясцілі «небяспечнай зброяй», якая ўяўляе «пагрозу грамадскай бяспецы».

Пераканаць ахову не ўдалося. Ходжкінсан прад’явілі ўльтыматум.

«Мне сказалі, што гэта зброя, і яны не могуць яе прапусціць. Перамовы былі немагчымыя. Прыйшлося выкінуць іх у смеццевае вядро прама там, на вачах ва ўсіх», — цытуе спартсменку выданне Onet.

Дарэчы, Кілі Ходжкінсан — адна з наймацнейшых бягунняў сучаснасці. На яе рахунку золата Алімпійскіх гульняў 2024 года ў Парыжы на дыстанцыі 800 метраў і серабро Алімпіяды 2020 года ў Токіа.