У Мінску юныя спартсмены, выхаванцы прафсаюзнай СДЮШАР «Хваля», пагутарылі з адным з самых вядомых фехтавальшчыкаў свету, алімпійскім чэмпіёнам і шматразовым чэмпіёнам свету, ветэранам фізічнай культуры і спорту Аляксандрам Раманьковым.
Сустрэча адбылася пры падтрымцы Федэрацыі прафсаюзаў Беларусі, якая вялікую ўвагу ўдзяляе развіццю дзіцячага і юнацкага спорту. Сёння ў сістэме ФПБ дзейнічаюць 92 спартыўныя школы па ўсёй краіне, дзе дзеці праходзяць падрыхтоўку па 52 відах спорту.
Мерапрыемства ў першую чаргу накіравана на захаванне пераемнасці пакаленняў, выхавання характару і мэтанакіраванасці ў юных спартсменаў. Жывыя зносіны з ветэранамі фізічнай культуры, знакамітымі спартсменамі натхняюць дзяцей на ўласныя дасягненні, матывуюць развівацца і весці актыўны, здаровы лад жыцця.
Як адзначыў Аляксандр Раманькоў, такія сустрэчы вельмі важныя, таму што дапамагаюць хлопчыкам і дзяўчынкам лепш зразумець, што шлях да поспеху пачынаецца ў першую чаргу з працы і дысцыпліны.
— Самае галоўнае — гэта прывіць працаздольнасць, жаданне рабіць тое, чаму цябе вучаць. Каб перамагаць, трэба шмат працаваць. Гэта вялікая работа. У свой час у мяне было па тры трэніроўкі за дзень. Але ні разу не было жадання кінуць спорт, — дадаў алімпійскі чэмпіён.
Яго прыклад сапраўды натхніў хлопцаў і дзяўчат. У прыватнасці, Ульяна Чудакова, выхаванка СДЮШАР прафсаюзаў па плаванні «Хваля», расказала: «Я з мінулага года займаюся плаваннем. Ужо ўдзельнічала ў трох спаборніцтвах. І таксама хачу стаць такім жа чэмпіёнам, як Аляксандр Анатольевіч».
На сустрэчы прысутнічалі і бацькі некаторых выхаванцаў школы, якія таксама адзначылі важнасць правядзення такіх мерапрыемстваў і заняткаў у спартшколе. Напрыклад, як падкрэсліла Аляксандра Лявонава, маці аднаго з выхаванцаў СДЮШАР прафсаюзаў па плаванні «Хваля», яе сын ужо пяць гадоў займаецца ў прафсаюзнай спартшколе, якая дае магчымасць не толькі развіцця спартыўных здольнасцяў, але і гартуе характар: «Дзеці вучацца стрэсаўстойлівасці, дысцыпліне, адказнасці. Тут ёсць усе ўмовы для дасягнення вынікаў — сучасны басейн, неабходны інвентар і прафесійныя трэнеры. Дзеці могуць прымаць удзел у спаборніцтвах рознага маштабу».
Сустрэча выхаванцаў сталічнай прафсаюзнай спартшколы стала стартам серыі такіх акцый. У планах падобныя мерапрыемствы праводзіць на пастаяннай аснове ва ўсіх рэгіёнах краіны.
Трэба адзначыць, што для прафсаюзаў падтрымка дзіцячага спорту — гэта ўклад у здароўе дзяцей. Таму ствараюцца ўсе неабходныя ўмовы — ад умацавання матэрыяльна-тэхнічнай базы ўстаноў, абнаўлення спартыўнага інвентара да бяспечных і камфортных умоў на трэніроўках.
Даведачна:
Установа «СДЮШАР па плаванні прафсаюзаў «Хваля» заснавана ў 1972 годзе. Сёння гэта адна з найбуйнейшых школ у сталіцы, у ёй займаюцца каля 600 дзяцей. Сярод выхаванцаў школы нямала прызёраў і чэмпіёнаў спаборніцтваў рознага ўзроўню, у тым ліку і міжнародных.
