У Палацы Незалежнасці — замежныя госці. Прэзідэнт Беларусі Аляксандр Лукашэнка сустрэўся з фельдмаршалам і вярхоўным галоўнакамандуючым Лівійскай нацыянальнай арміяй Халіфам Белкасім Хафтарам. Лівійская дэлегацыя гэтымі днямі знаходзіцца ў Беларусі з мэтай наладжвання супрацоўніцтва з Беларуссю ў эканамічнай, гуманітарнай і сацыяльнай сферах.
«Прашу лічыць, што вы прыехалі да сваіх сяброў, да сябе дадому, — звярнуўся беларускі лідар да замежнага госця. — Шмат пра вас чытаў, шмат чуў, шмат расказвалі мне. Але сустракаюся ўпершыню. Я хачу, каб вы ведалі, што мы вельмі добра дасведчаныя аб сітуацыі ў Лівіі. Мы вельмі добра ведаем Лівію. У мяне да вашага народа асаблівае стаўленне, я бываў у Лівіі ў свой час. Канешне, сёння гэта ўжо іншая Лівія. Але вы павінны ведаць, што мы гатовы зрабіць для вас усё, што вы ўбачыце карыснага ў Беларусі. Усё, аб чым мы дамовімся сёння, у гэтыя дні, якія вы будзеце ў Беларусі, мы выканаем своечасова». Аляксандр Лукашэнка прывітаў таксама ўсіх членаў дэлегацыі і запэўніў, што беларусы гатовы да сумеснай работы.
Халіф Хафтар прызнаўся, што пра Аляксандра Лукашэнку чуў шмат добрых слоў. «Мы вельмі рады сустрэцца з вамі, спадар Прэзідэнт. Мы вельмі рады наведваць Беларусь. Вялікі вам дзякуй за запрашэнне», — сказаў ён. Халіф Хафтар назваў Беларусь краінай міру і спакою. «Мы хочам супрацоўнічаць з вамі, наладжваць узаемныя адносіны на карысць дзвюх краін, на карысць двух народаў. Ваша кіраўніцтва зрабіла Беларусь высокатэхналагічнай краінай у плане ваеннай тэхнікі, у прамысловай сферы, у аграрнай — усё ў вас развіваецца на высокім узроўні», — падкрэсліў фельдмаршал. Па словах Халіфа Хафтара, кожная дзяржава павінна імкнуцца стаць такой спакойнай краінай, як Беларусь.
«Нягледзячы на тое, што вакол вас вельмі шмат неспакойных кропак, мы перакананы, і жаданне ў нас вельмі вялікае наладзіць супрацоўніцтва паміж намі на будучыню», — заявіў ён.
Фота БелТА
