Прэзідэнт Беларусі Аляксандр Лукашэнка сабраў нараду аб эфектыўнасці сістэмы гандлёвага абслугоўвання насельніцтва ў маштабах Рэспублікі Беларусь. Перш за ўсё, кіраўнік дзяржавы патлумачыў, чаму гэтае пытанне найважнейшае.
Аляксандр Лукашэнка звярнуў увагу, што цяпер дамы ў сельскай мясцовасці пад дачы або для пастаяннага пражывання ўсё часцей сталі купляць гараджане і, што асабліва каштоўна, маладыя сем’і. «Дай бог, каб гэта было так, што гараджане пачалі купляць дамы ў сельскай мясцовасці. Пра што я беларусаў прасіў, заклікаў іх рабіць гэта цяпер, бо купяць іншыя, — адзначыў Прэзідэнт. — Зразумела, што для жыхароў такіх вёсак закрыццё стацыянарнай крамы — гэта падзея, якая спараджае масу праблем. І натуральна, што ў ХХІ стагоддзі страта магчымасці купіць самае неабходнае выклікае заканамерныя прэтэнзіі».
Закрыццё крамы ў вёсцы беларускі лідар назваў вялікай праблемай для тых людзей, якія там пражываюць. «Для чалавека ўсё роўна, чый аб’ект зачыніўся — прыватнага прадпрымальніка, камунальнай уласнасці або сістэмы спажыўкааперацыі», — заявіў Прэзідэнт. Таму ўраду і аблвыканкамам была пастаўлена задача — патрэбна эфектыўная сістэма абслугоўвання ў маштабах краіны, якая павінна стаць гарантам якасці і сацыяльнай адказнасці гандлю перад людзьмі.
З апошніх прыкладаў непрадуманых рашэнняў Аляксандр Лукашэнка назваў атрыманне электронных лічбавых подпісаў і маркіроўку тавараў спецыяльнымі пазнакамі і знакамі, якія, паводле яго слоў, для невялікага магазінчыка ў тры паліцы — цэлы квэст.«Зыходзячы з прадстаўленага мне дакладу ўрада, высновы такія, як звычайна: усё па плане, насельніцтва абслугоўваецца на належным узроўні, але стрымліваюць развіццё гандлю нейкія рэгулятарныя бар’еры, — адзначыў кіраўнік дзяржавы. — Хочацца спытаць, вы самі разумееце, што пішаце? Гэта, па-вашаму, галоўныя перашкоды для працы сельскіх крам? Кіраваць не можам, рэгуляваць працэс не можам. Я б хацеў ведаць, хто вам ўсталёўвае гэтыя бар’еры рэгуляторыкі, акрамя вас саміх, і чаму яны яшчэ не ліквідаваныя, гэтыя бар’еры? Па вашых жа даных, рэалізуецца некалькі краінавых канцэпцый, стратэгій і планаў для сельскіх жыхароў. Дык чаму такія праблемы і незадаволенасць насельніцтва?»
«Наогул, у любой справе можна дайсці да абсурду, увайшоўшы ў адміністрацыйны запал. Даніна модзе — бесталковая лічбавізацыя, напрыклад, уліку і продажу малочных прадуктаў, выклікала бурнае абурэнне як пакупнікоў, так і прадаўцоў (аж да звальнення) ва ўсіх рэгіёнах», — заўважыў кіраўнік дзяржавы. Паводле яго слоў, ураду трэба яшчэ раз вярнуцца да гэтага пытання і ў самыя кароткія тэрміны ўсё разумна спрасціць. А калі трэба — зрабіць для вёскі асаблівы парадак. Прэзідэнт заўважыў, што людзям на вёсцы не трэба шмат — «малако, мяса, кавалак хлеба», а не лічбавізацыя.
