«Успамінаю моманты, калі праязджаў кінатэатры, дзе ідзе фільм „Ідзі і глядзі“. І калі каля кінатэатра стаяць пяць-сем карэт хуткай дапамогі, то гэта „Ідзі і глядзі“ ідзе», — расказаў Аляксей Краўчанка, адзначыўшы, што ніколі б не падумаў, што з гэтага можна нейкім чынам здзекавацца.

«У мяне не ўкладваецца ў галаве. Я глыбока здзіўлены сітуацыяй. Але, напэўна, ёсць яшчэ нейкія, я не ведаю, арганізацыі, якія неяк павінны адсочваць гэта. Калі не, рабяты, я разводжу рукі і кажу: ну, значыць, у нас будзе вось такое пакаленне. Значыць, мы хочам такое пакаленне. Значыць, далей будзе яшчэ горш», — адзначыў ён.

Кажучы пра абавязковасць прагляду фільма «Ідзі і глядзі», Аляксей Краўчанка адзначыў, што ніхто нікога глядзець карціну не прымушае.

«Але хаця б трэба ведаць, разумець, пра што гэты фільм. І я бачу, як велізарная колькасць, проста мора гледачоў (якія бачылі яго хоць бы аднойчы. — Заўв. БелТА) былі абураныя гэтай сітуацыяй. У мяне толькі адно пытанне. Выканаўца можа не ведаць у сілу свайго ўзросту, у сілу свайго нейкага жыцця... Не з гэтай планеты, мабыць. Але ёсць заснавальнік, ёсць той чалавек, каму прыйшла ў галаву такая дзіўная думка зрабіць фотакалаж з галоўным героем фільма — Флёрай. Абляпіць твар татуіроўкамі...» — адзначыў Аляксей Краўчанка. Ён таксама назваў такія паводзіны недаглядам бацькоў у выхаванні.

«Ёсць бацькі, якія з вялікім сэрцам унутры выхоўваюць сваіх дзяцей, хочуць бачыць чалавека з вялікай літары, з душой, а не паўфабрыкат. Давайце гадаваць нашых дзяцей вялікімі, а не паўфабрыкатамі», — адзначыў Аляксей Краўчанка.

Як паведамлялася раней, падставай для рэзкай крытыкі з боку народнага артыста стаў новы кліп Крыда «Мілы вырадак». Спявак зняўся ў лонгсліве з постарам шэдэўра Элема Клімава, дзе твар беларускага падлетка Флёры абмалявалі татуіроўкамі і пірсінгам.

Генеральная пракуратура падчас маніторынгу інтэрнэт-рэсурсаў выявіла інфармацыю, якая патрабавала праверкі ў рамках Крымінальна-працэсуальнага заканадаўства, і прапанавала праверыць кліп вядомага выканаўцы на наяўнасць прыкмет распальвання варожасці. 

У сетцы размешчаны кліп спевака Ягора Крыда, у якім выканаўца з’явіўся ў вопратцы са стылізаванай выявай галоўнага героя фільма «Ідзі і глядзі». Дызайнеры, якія распрацавалі такі малюнак, выкарыстоўвалі афішу фільма, прычым дамалявалі партрэту галоўнага героя татуіроўку і пірсінг, а таксама надпіс «Маркіроўка дыстанцыі». Дэманстрацыя кліпа выклікала шырокі грамадскі рэзананс і атрымала негатыўную ацэнку ў сацсетках і месенджарах. 

Генеральная пракуратура прапанавала Следчаму камітэту даследаваць выкладзеныя абставіны на наяўнасць прыкмет распальвання сацыяльнай варожасці або варожасці, рэабілітацыі нацызму, адмаўлення генацыду беларускага народа, а таксама іншых злачынстваў.