Конкурс праходзіць у Стамбуле 13-19 ліпеня. Ён аб’яднаў каля 40 калектываў з краін Еўропы, Азіі, Афрыкі, Паўднёвай і Паўночнай Амерыкі. Артысты «Радасці» на сусветнай арэне прэзентуюць багацце беларускай танцавальнай культуры.

Для выступлення выбраны нумары, якія адлюстроўваюць культурна-бытавую спадчыну Беларусі, падабраны яркія касцюмы. Праграма спалучае тэмпераментнасць і лірычнасць танцаў. «У конкурсную праграму нашага калектыву ўваходзяць харэаграфічная кампазіцыя „На Купалле“, харэаграфічная замалёўка „Пастушок“ і фальклорна-абрадавая кампазіцыя „Кірмаш“, — расказалі прадстаўнікі ансамбля. — Таксама мы падрыхтавалі сольнае выступленне, уключыўшы ў яго не толькі беларускія танцы, але і іншыя, якія парадуюць гледача сваёй энергетыкай».

Сольны канцэрт пройдзе ў адной з канцэртных залаў Стамбула пры падтрымцы беларускага консульства 17 ліпеня.

У час фестывалю таксама праходзяць розныя афіцыйныя і творчыя сустрэчы, удзельнікі абменьваюцца сувенірамі і наведваюць гістарычныя мясціны, дадалі прадстаўнікі калектыву.