Дзмітрый Кастрыцкі лічыць, што апалае лісце з участка варта прыбіраць, паколькі пад ім на зімоўку могуць схавацца розныя насякомыя-шкоднікі і смаўжы. Акрамя таго, на лісці могуць знаходзіцца хваробатворныя споры. Што ж рабіць з імі пасля прыборкі? Садоўнік падказаў чатыры варыянты.

Так, апалае лісце можна закінуць у кампост, адзначыў Дзмітрый Кастрыцкі:

— У кампосце яго будуць перапрацоўваць розныя глебавыя мікраарганізмы, тыя ж дажджавыя чарвякі. І за год ад апалага лісця практычна нічога не застаецца — усё перапрацуюць.

Таксама можна прыгатаваць ліставую зямлю — дабаўку, якую ўносяць у лункі пры пасадцы розных раслін і ў грунт для расады. Агароднінныя і пладовыя культуры не маюць агульных захворванняў, таму такі спосаб не нашкодзіць.

— Змясціце апалае лісце ў чорны смеццевы пакет. Злёгку ўвільгатніце лістоту вадой, калі яна сухая. Абавязкова дадайце агародную зямлю або перапрэлы кампост, хоць бы пару жменек. Пакет шчыльна завяжыце, зрабіце некалькі дзірак па баках для цыркуляцыі паветра. Пастаўце яго пад дрэва. Лісце будзе перапрацоўвацца досыць доўга — прыкладна да наступнага лета або восені, — патлумачыў садоўнік.

Акрамя таго, лісце можна выкарыстоўваць пры перакопцы агарода.

— Размяркуйце лісце па градках і закапайце ў глебу. Да вясны ад яго практычна нічога не застанецца, — расказаў Дзмітрый Кастрыцкі.

Лісце таксама ўжываюць для ўцяплення пасадак на зіму.

— Калі вы пасадзілі цыбулю, часнок на зіму, можаце сабраць апалае лісце і ўцяпліць градку. Каб лісце не здзьмула ветрам, пакладзіце яшчэ трохі галінак, — дадаў садоўнік.