Выбарчая акруга члена Пастаяннай каміісіі па адукацыі, культуры і навуцы Палаты прадстаўнікоў Сяргея КЛІШЭВІЧА тэрытарыяльна адпавядае Кастрычніцкаму раёну сталіцы — раёну з развітай прамысловай інфраструктурай. Тут знаходзяцца такія флагманы беларускай прамысловасці, як ААТ «Інтэграл», ААТ «Керамін», ААТ «Крыён». Паводле слоў дэпутата, колькасць насельніцтва выбарчай акругі складае каля 60 тысяч чалавек, пастаянную аператыўную сувязь з якімі Сяргей Клішэвіч лічыць адным з галоўных прынцыпаў сваёй дзейнасці.

Людзям трэба даступна тлумачыць сутнасць рашэнняў

Значная частка абавязкаў кожнага дэпутата звязана з правядзеннем інфармацыйна-тлумачальнай работы сярод насельніцтва. Часам гэтая дзейнасць не абмяжоўваецца выбарчай акругай — жыхары Кастрычніцкага раёна працуюць на прадпрыемствах, размешчаных па ўсім Мінску. Дарэчы, як прадстаўнік прамысловага раёна сталіцы, Сяргей Клішэвіч адзначае яго асаблівую ролю ў рэалізацыі эканамічных прыярытэтаў краіны: «Канкурэнтаздольнасць беларускіх заводаў і фабрык — гэта аснова фінансавай стабільнасці нашай дзяржавы. Паступленні ў бюджэт, якія забяспечвае прамысловасць, напрамую ўплываюць на магчымасць фінансавання сацыяльнай сферы: аховы здароўя, адукацыі, інфраструктурных праектаў. Таму пытанні мадэрнізацыі вытворчасці, укаранення новых тэхналогій і павышэння эфектыўнасці работы прадпрыемстваў акругі павінны знаходзіцца ў зоне пастаяннай увагі як саміх прадпрыемстваў, так і ўлады».

Дарэчы, асабістыя сустрэчы з выбаршчыкамі, на думку Сяргея Клішэвіча, выконваюць адразу некалькі важных функцый: інфармаванне аб рашэннях, якія прымаюцца ў краіне, іх тлумачэнне, а таксама процідзеянне распаўсюджванню недакладнай, фэйкавай інфармацыі: «Сёння як ніколі важна прамая камунікацыя. Людзям неабходна даступна тлумачыць сутнасць рашэнняў, якія прымаюцца на дзяржаўным узроўні: ці то праграма сацыяльна-эканамічнага развіцця, ці то змены ў заканадаўстве. Тады знікае глеба для няправільных здагадак і інтэрпрэтацый».

• Найважнейшая тэма апошніх такіх сустрэч дэпутата — тлумачэнне рашэнняў Усебеларускага народнага сходу і прыярытэтаў прынятай праграмы сацыяльна-эканамічнага развіцця краіны. Якасна і эфектыўна даносіць інфармацыю народу дазваляе выкарыстанне жывой мовы, пазбягаючы фармальнасцей і афіцыёзу: «Калі тлумачыш сутнасць рашэнняў канкрэтнымі прыкладамі, лічбамі і фактамі, у людзей з’яўляецца іх разуменне і падтрымка, — дзеліцца парламентарый. — Аб’ездзіўшы дзясяткі прадпрыемстваў з тлумачэннем праграмы сацыяльна-эканамічнага развіцця, я яскрава бачыў у людзях адабрэнне ўсіх яе прыярытэтаў. Усе яны аднолькава важныя для паспяховага развіцця нашай краіны. Але людзі справядліва патрабуюць, каб з імі размаўлялі на простай, зразумелай мове, тлумачылі, як тыя ці іншыя рашэнні адаб’юцца менавіта на іх жыцці, лёсе і будучыні».

Напрыклад, калі сярод выбаршчыкаў Кастрычніцкай выбарчай акругі № 96 распаўсюдзіліся чуткі аб павышэнні пенсіённага ўзросту, іх удалося купіраваць у тым ліку дзякуючы своечасовым тлумачэнням падчас асабістых сустрэч з дэпутатам. Дарэчы, асаблівую ўвагу Сяргей Клішэвіч удзяляе рабоце з моладдзю, бо перакананы: цікавасць да грамадска-палітычнага жыцця ўзнікае тады, калі маладыя людзі бачаць прамую сувязь паміж стратэгіяй развіцця краіны і сваімі асабістымі перспектывамі — магчымасцямі ў адукацыі, кар’ерным росце і будучым дабрабыце.

Пад кантролем улады

Прычым побач з традыцыйнымі варыянтамі на першы план усё часцей выходзіць лічбавы фармат работы з насельніцтвам. «Інфармацыя аб маёй інтэрнэт-прыёмнай размешчана ў крамах і сацыяльных аб’ектах маёй акругі, кожны можа патэлефанаваць, напісаць, паведаміць пра сваю праблему». Дарэчы, такі канал сувязі з насельніцтвам даказаў сваю эфектыўнасць і запатрабаванасць: большасць выбаршчыкаў звяртаюцца да дэпутата Кастрычніцкай выбарчай акругі № 97 менавіта праз анлай-прыёмную, якая працуе фактычна кругласутачна.

«Мой прынцып — на кожны запыт павінен быць дадзены выразны адказ, а абяцанне — абавязкова выканана», — адзначае Сяргей Клішэвіч. Штомесяц да яго паступае каля 10–15 зваротаў рознага характару. Найбольш актуальнымі для выбаршчыкаў застаюцца пытанні сацыяльнага забеспячэння, аховы здароўя, адукацыі, добраўпарадкавання гарадскога асяроддзя. 

«У такіх сітуацыях дэпутат выступае ў ролі эфектыўнага каардынатара паміж грамадзянінам і органамі выканаўчай улады. Прамы кантакт з кіраўніцтвам раённай адміністрацыі, гарадскіх службаў і ўстаноў дазваляе ў самыя кароткія тэрміны станоўча вырашаць самыя розныя праблемы, а таксама кантраляваць іх выкананне», — тлумачыць ён.

Парламентарый падкрэслівае: работа дэпутата часта заключаецца ў вырашэнні лакальных, невялікіх, але вельмі важных для паўсядзённага жыцця простага чалавека задач. Яскравы прыклад — гісторыя з пешаходным пераходам на вуліцы Каржанеўскага. Падчас адной з працоўных сустрэч з калектывам ААТ «Паліграфкамбінат імя Якуба Коласа» работнікі звярнуліся да Сяргея Клішэвіча з просьбай аднавіць пераход, які знік пасля будаўніцтва метро і рэканструкцыі прылеглай тэрыторыі. Яго адсутнасць стварала для супрацоўнікаў прадпрыемства штодзённыя нязручнасці і ўяўляла прамую небяспеку, прымушаючы людзей пераходзіць дарогу ў неналежным месцы. Пытанне было аператыўна вырашана ва ўзаемадзеянні з гарадскімі камунальнымі службамі. А на дадзены момант на кантролі дэпутата знаходзіцца добраўпарадкаванне тэрыторыі ў раёне Беларускага дзяржаўнага медыцынскага каледжа — работы ўжо запланаваны і будуць праведзены ў найбліжэйшы час, як толькі дазволяць умовы надвор’я.

Аміна НАЗАРАВА

Фота з асабістага архіва Сяргея Клішэвіча