7 чэрвеня ўмовы надвор’я ў Беларусі будуць вызначаць атмасферныя франты і цёплая няўстойлівая паветраная маса, якія распаўсюджваюцца з паўднёвага захаду, паведамілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
На большай частцы тэрыторыі краіны пройдуць кароткачасовыя дажджы, ноччу месцамі, днём у многіх раёнах прагрымяць навальніцы. Днём пры навальніцах у асобных раёнах чакаюцца моцныя ліўні і град. Ноччу і раніцай месцамі слабы туман. Вецер паўднёва-заходні, паўднёвы ўмераны, удзень пры навальніцах месцамі шквалістае ўзмацненне ветру. Тэмпература паветра мінімальная ноччу ад плюс 13 да плюс 19 ° С, максімальная днём ад плюс 23 да плюс 29 ° С, у паўднёва-ўсходніх раёнах паветра прагрэецца ад плюс 30 да плюс 32 °С. Атмасферны ціск істотна не зменіцца.
