У экспазіцыі будуць прадстаўлены больш за 150 статуэтак і лялек клоўнаў, якія на працягу многіх гадоў збіраў заслужаны дзеяч культуры Беларусі Якаў Лабовіч. Ён амаль 40 гадоў нязменна ўзначальваў Гомельскі цырк, які пры ім быў удастоены звання «Заслужаны калектыў Рэспублікі Беларусь».

Як адзначылі ў палацы, калекцыя статуэтак і лялек клоўнаў Якава Лабовіча пачала збірацца спантанна — з падарунка ад дачкі Ірыны. «Маленькага металічнага клоўна на веласіпедзе — таго самага, першага — таксама можна будзе ўбачыць на выставе разам з дзясяткамі іншых „артыстаў“ з фарфору, керамікі, шкла, тэкстылю, прывезеных з розных куткоў свету», — расказалі арганізатары выставы.

У 2025 годзе нашчадкі Якава Лабовіча перадалі ў дар музею Гомельскага палацава-паркавага ансамбля больш за сто захаваных у разнастайных вобразах і матэрыялах клоўнаў. На выставе кампанію ім складуць таксама фігуркі, якія засталіся ў прыватным зборы сям’і. «Вялікія і маленькія, задуменныя і ўсмешлівыя, музычныя і танцуючыя на вяровачках, клоўны прыцягваюць погляд і выклікаюць міжвольную ўсмешку — як калі б раптоўна вярнуўся той чароўны час, калі ўсе мы былі дзецьмі з салодкай ватай у руках, заміраючымі ад захаплення ў чаканні моманту, калі пад гучныя гукі аркестра ажыве цыркавая арэна», — адзначылі ў палацава-паркавым ансамблі.

«Запрашаем усіх за цудоўным настроем, яркімі фарбамі і не менш яркімі эмоцыямі на «гастролі» самай незвычайнай трупы — на выставу «Клоўны: гісторыя адной калекцыі», — рэзюмавалі ў палацы.