Андрэй Вірачкін адзначыў, што ў міжацяпляльны сезон прадугледжаны шэраг работ, накіраваных на арганізацыю бесперабойнага забеспячэння спажыўцоў цяплом і гарачай вадой у ацяпляльны перыяд. «Гэта даволі вялікі пералік мерапрыемстваў. У першую чаргу гэта адключэнне цеплавых магістраляў і гідраўлічныя выпрабаванні. Упэўнены, што нашы спажыўцы не сутыкнуцца з праблемамі зімой і цяпло будзе надзейна пастаўляцца ў дамы», — сказаў ён.

Акрамя таго, спецыялісты прадпрыемства пастаянна працуюць над скарачэннем тэрмінаў адключэнняў. Сёлета пры нарматыве ў 13 дзён «Мінсккамунцепласетка» разлічвае, што сярэдні тэрмін адключэння складзе 9,6 сутак. «Мы таксама прынялі шэраг тэхнічных рашэнняў, якія дазволяць пазбегнуць адключэнняў нашых спажыўцоў пры пераўрэзцы. Гэта ўключае ўстаноўку дадатковай запорнай арматуры. На сённяшні дзень мы прапрацоўваем магчымасць выканання работ без адключэння. Такія тэхналогіі існуюць, і мы спрабуем іх прымяненне на нашых аб’ектах», — дадаў Андрэй Вірачкін.

Прадпрыемства таксама дэталёва прааналізавала стан усіх аб’ектаў. Са слоў дырэктара, з пачатку года абноўлена 12,45 км цеплавых сетак. Усяго ў планах на гэты год — рэканструкцыя 55 км цепласетак. «У нас ёсць праграма развіцця і мадэрнізацыі прадпрыемства на найбліжэйшыя пяць гадоў. Гэта праграма ахопіць усе аб’екты прадпрыемства. Акрамя таго, кіраўніцтвам гарвыканкама пастаўлена задача аб стварэнні ўласнага будаўнічага падраздзялення, якое будзе выконваць усе неабходныя задачы па рэканструкцыі і мадэрнізацыі аб’ектаў прадпрыемства ўласнымі сіламі», — расказаў дырэктар.