З перамогай Арыну Сабаленка павіншаваў Прэзідэнт Беларусі Аляксандр Лукашэнка. «Моцнай, стабільнай і прыгожай гульнёй ты чарговы раз пацвердзіла сваё лідарства ў жаночым сусветным тэнісе. Ганарымся тваімі поспехамі і заўсёды балеем за цябе. Жадаю табе моцнага здароўя і новых дасягненняў», — гаворыцца ў віншаванні беларускага лідара. 

Пасля перамогі ў Маямі Арына Сабаленка замацавала статус першай ракеткі свету. У рэйтынгу WTA яна больш чым на тры тысячы ачкоў апярэджвае польскую тэнісістку Ігу Свёнтак, якая займае другі радок.

Каманда тыдня. Хакеісты «Дынама-Мінск» упэўнена пачалі выступленне ў першым раўндзе плэй-оф Кантынентальнай хакейнай лігі. Першым сапернікам «зуброў» стала маскоўская ЦСКА. Серыя пачалася на «Мінск-арэне». На сваім лёдзе мінчане выйгралі два матчы — першы з вынікам 5:2, другі — 5:3. Але мінчане ўступілі ў матчы ў Маскве — 1:4. Чацвёрты матч серыі адбудзецца 1 красавіка на ЦСКА-арэне. Паколькі серыя працягваецца да чатырох перамог, 3 красавіка каманды зноў сустрэнуцца на лёдзе «Мінск-арэны».

Гераіня тыдня. Беларуская спартсменка Дар’я Вярэніч стала чатырохразовай пераможцай міжнароднага турніру па мастацкай гімнастыцы AGF Trophy ў Баку. Яна заваявала залатыя медалі ў практыкаваннях з абручом (27,100 бала), стужкай (27,450) і булавамі (27,800), а таксама стала найлепшай у мнагаборстве.

Турнір тыдня. Беларусы выступаюць на чэмпіянаце Расіі па біятлоне, які праходзіць у Ханты-Мансійску. 

Антон Смольскі перамог у мужчынскім мас-старце на 15 км. Дзмітрый Лазоўскі перамог у мужчынскім спрынце. Каманда «Беларусь-1», у складзе якой выступілі Мікіта Лабастаў, Антон Смольскі, Павел Бялько і Дзмітрый Лазоўскі, заняла другое месца ў мужчынскай эстафеце. Жаночая каманда «Беларусь-1», за якую выступілі Ганна Сола, Ксенія Варабей, Ірына Шаклеіна і Дзінара Смольская, заняла трэцяе месца ў эстафеце.

Фота з адкрытых крыніц