Суд у Катавіцы адправіў пад трохмесячны арышт прэзідэнта Алімпійскага камітэта Польшчы (PKOl) Радаслава Пясевіча. Рашэнне суда 29 жніўня пацвердзіла прадстаўнік генеральнага пракурора Польшчы Ганна Адамяк, паведамляе Польскае агенцтва друку. Следства прад’явіла кіраўніку Польскага алімпійскага камітэта два абвінавачанні, абодва звязаныя з крыптабіржай Zondacrypto. Сам ён віну не прызнае.

Як паведамляе выданне Onet са спасылкай на ўнутраны ліст Міжнароднага алімпійскага камітэта, адным з магчымых сцэнарыяў развіцця сітуацыі можа стаць прыпыненне членскіх правоў PKOl.

Пясевіч быў затрыманы на мінулым тыдні ў рамках расследавання справы, звязанай з крыптавалютнай біржай Zondacrypto. Польская пракуратура вывучае дзейнасць кампаніі пасля скаргаў кліентаў, якія заявілі аб немагчымасці вывесці свае сродкі. Па даных польскіх СМІ, патэнцыйная шкода ацэньваецца прыкладна ў 350 млн злотых, што складае каля €80 млн.

Паводле інфармацыі Onet, МАК накіраваў кіраўніцтву Польскага алімпійскага камітэта ліст, у якім выкладзены тры магчымыя варыянты далейшага развіцця сітуацыі. Самы негатыўны з іх прадугледжвае прыпыненне членскіх правоў PKOl.

Яшчэ два сцэнарыі мяркуюць добраахвотную адстаўку Пясевіча з пасады кіраўніка Польскага алімпійскага камітэта альбо рашэнне самога PKOl аб прыпыненні яго паўнамоцтваў ці звальненні.

Сітуацыя атрымала дадатковы рэзананс з-за супрацоўніцтва алімпійскага камітэта з Zondacrypto. У кастрычніку 2025 года крыптавалютная біржа стала генеральным спонсарам Польскага алімпійскага камітэта і нацыянальнай алімпійскай зборнай. Пагадненне заключана да 2028 года.

Яшчэ ў красавіку 2026 года Пясевіч заяўляў, што камітэт не мае юрыдычных падстаў для датэрміновага скасавання кантракта з кампаніяй. Паводле яго слоў, спыненне пагаднення магло прывесці да выплаты штрафу, які PKOl не ў стане сабе дазволіць.

Цяпер развіццё справы можа закрануць не толькі кіраўніцтва Польскага алімпійскага камітэта, але і становішча польскіх спартсменаў на міжнароднай арэне.