«Нашэнне сумкі на адным плячы можа прывесці не толькі да скрыўлення плячэй, але і таза, а таксама да парушэння ў рабоце ўнутраных органаў», — папярэдзіла мануальны тэрапеўт, астэапат Таццяна Рудавец, піша «Газета.Ru».

Па словах урача, праблем можа дадаць і няправільнае становішча цела пры сядзенні за сталом і на канапе з тэлефонам. 

Яна адзначыла, што з-за недастатковай фізічнай актыўнасці мышцы спіны і плечавога пояса слабеюць, з’яўляюцца сутуласць, затым — перакос таза, змяненне даўжыні ног, плоскаступнёвасць. 

Акрамя таго, парушаецца кровазварот і інервацыя, што прыводзіць да скаліёзу, лёгачных паталогій, праблем са страўнікава-кішачным трактам, гінекалагічных захворванняў, растлумачыла спецыяліст. І падкрэсліла, што скрыўленне паставы механічна зрушвае страўнік і кішэчнік, а дэфармацыя пазваночніка парушае інервацыю органаў, правакуючы запаволенне апаражнення страўніка, уздуцце, пякотку і рэфлюкс.

«Калі ёсць перакос у плячах (адно вышэй за другое), сумку мы носім на плячы, якое першапачаткова вышэй, бо з другога пляча яна будзе з’язджаць. Для таго, каб яна не спадала, падчас хады ўвесь час напружваецца трапецападобная мышца. З часам яна перастае расслабляцца зусім і будзе нагадваць аб сабе болем, пасля могуць з’явіцца праблемы ў грудным аддзеле пазваночніка і боль перамесціцца далей уніз», — адзначыла ўрач.

Пры прыкметным перакосе плячэй або болі ў спіне варта звяртацца да астэапата, рэабілітолага або спецыяліста ЛФК, парэкамендавала эксперт.

Каб знізіць магчымую нагрузку, яна параіла перыядычна мяняць бок нашэння сумкі, выбіраць мадэлі з шырокімі рамянямі або выкарыстоўваць заплечнікі, якія раўнамерна размяркоўваюць вагу.

Каб пазбегнуць фарміравання мышачных дысбалансаў, добра займацца плаваннем, рабіць масаж, практыкаванні на ўмацаванне мышцаў спіны і прэсу.