Цэлых пяць метэорных патокаў можна будзе назіраць у лістападзе пры ўмове бясхмарнага і не засвечанага гарадскім асвятленнем неба, для назірання некаторых з іх складуцца вельмі добрыя ўмовы, расказаў астраном Аляксандр Якушачкін, перадае РІА «Новости».

«У лістападзе ўсіх назіральнікаў на Зямлі чакае некалькі метэорных патокаў, вылучыць можна як мінімум пяць. Гэта Паўднёвыя Таўрыды, Паўночныя Таўрыды, Леаніды, Альфа-Монацэратыды і лістападаўскія Арыяніды», — паведаміў Якушачкін.

Спецыяліст па метэорных патоках ахарактарызаваў кожны з іх: Паўднёвыя і Паўночныя Таўрыды — метэорныя патокі, родапачынальніцай якіх з’яўляецца камета Энке, але пікі іх актыўнасці разнесены па часе. Тым не менш радыянты абодвух патокаў (уяўны пункт вылету метэораў на нябеснай сферы) — з аднаго сузор’я Цяльца, але ў розных частках сузор’я, а пікі актыўнасці прыпадуць на 5 і 12 лістапада, і Месяц сёлета не перашкодзіць іх назіранню, зазначыў эксперт.

Наступны ў храналагічным парадку ў лістападзе — вядомы метэорны паток з радыянтам у сузор’і Леў — Леаніды. Максімум — 17 лістапада, бацькоўскае цела — камета Тэмпля-Тутля. Леаніды знакамітыя ўспышкамі актыўнасці, калі гаворка ішла аб назіранні дзясяткаў тысяч метэораў за ноч. Месяц у ноч максімуму сёлета зойдзе за гарызонт адразу пасля паўночы, таму ўмовы для назіранняў патоку — выдатныя, расказаў астраном.

Яшчэ два патокі — Альфа-Монацэратыды і лістападаўскія Арыяніды маюць пікі актыўнасці 21–22 і 27–28 лістапада, але іх назіранням перашкодзіць яркі Месяц. Альфа-Монацэратыды — паток, які можа паднесці сюрпрызы актыўнасці, мае радыянт у сузор’і Аднарога, адсюль і паходзіць яго назва, адзначыў эксперт.

Лістападаўскія Арыяніды «ляцяць» з Арыёна, знакамітага экватарыяльнага сузор’я, які добра назіраецца ноччу позняй восенню і зімой, асабліва ў паўднёвых рэгіёнах, дадаў ён. У адрозненне ад кастрычніцкіх Арыянід, бацькоўскім целам патоку з’яўляецца не камета Галея, дакладна яно не ўстаноўлена, але сам паток ужо прызнаны асобным і ўнесены ў міжнародную базу даных, расказаў астраном.