На Камсамольскім возеры ў Мінску ў лістападзе лёду яшчэ няма, аднак тэмпература вады складае каля +4 °С. У такіх умовах асабліва небяспечна недаацэньваць рызыку пераахаладжэння і выходзіць да вадаёма ў адзіночку.

«Людзі недаацэньваюць халодную ваду. Улетку, калі чалавек упаў за борт, у яго ёсць час: ён плавае, крычыць, яго заўважаюць. Увосень лік ідзе на хвіліны», — адзначыла вядучы спецыяліст Мінскай гарадской арганізацыі АСВОД Ніка Баяльская.

Пры падзенні ў халодную ваду ўзнікае халадовы шок: дыханне становіцца некантраляваным, чалавек можа міжвольна ўдыхнуць пад вадой і захлынуцца. Холад таксама абмяжоўвае рухомасць, а намоклае адзенне цягне ўніз. Дадатковую нагрузку холад стварае для сардэчна-сасудзістай сістэмы, асабліва ў людзей з хранічнымі захворваннямі.

Важна памятаць і аб небяспецы адтэрмінаванага пераахаладжэння — тэмпература цела можа працягваць зніжацца ўжо пасля выратавання. Неабходна зняць з пацярпелага мокрае адзенне, ахінуць яго ў сухія коўдры ці тэрмакоўдру, атуліць галаву. Калі чалавек знаходзіцца ў прытомнасці, яму можна прапанаваць цёплае, але не гарачае пітво. Расціраць пацярпелага, выкарыстоўваць грэлкі і змяшчаць яго ў гарачую ванну не рэкамендуецца. Нават пры добрым самаадчуванні пасля здарэння неабходны агляд медыцынскага работніка.

Па даных Мінскай гарадской арганізацыі АСВОД, у 70% няшчасных выпадкаў на вадзе людзі былі ў алкагольным ап’яненні. Сярод фактараў рызыкі таксама адсутнасць выратавальных камізэлек і сродкаў сувязі, выхад на лёд у цемры або пры дрэннай бачнасці, спробы скараціць шлях па неакрэплай паверхні.

Асаблівую небяспеку з надыходам маразоў уяўляе першы лёд. Згодна з правіламі аховы жыцця людзей на водах, выходзіць на лёд забаронена, пакуль таўшчыня не дасягне 7 см — такая таўшчыня дапускае выхад толькі аднаго чалавека без рыштунку. Больш слабым лічыцца белы лёд, а шэры, матавы і жаўтлявы — ненадзейным. Правяраць трываласць лёду ўдарам нагі нельга.

У АСВОДзе зазначаюць, што важная частка работы ў асенне-зімовы перыяд — прафілактыка. Ратавальнікі патрулююць акваторыі, праводзяць рэйды і гутаркі з рыбакамі, сустракаюцца з працоўнымі калектывамі і навучэнцамі. У час экскурсій у музеі Мінскай гарадской арганізацыі АСВОД дзецям паказваюць выратавальнае абсталяванне і тлумачаць асновы аказання першай дапамогі.

Ратавальнікі нагадваюць: не трэба выходзіць да вадаёмаў у адзіночку, грэбаваць сродкамі бяспекі і правяраць трываласць неакрэплага лёду. У экстраннай сітуацыі неабходна тэлефанаваць па нумары 112.