З надыходам халадоў людзі часцей сутыкаюцца з сухасцю, стомленасцю вачэй і часовым затуманьваннем зроку. Пры гэтым прычына такіх змен не ў нізкай тэмпературы, а ў змене звыклага ладу жыцця. Пра гэта расказаў дзіцячы афтальмолаг, афтальмахірург, прафесар, доктар медыцынскіх навук Ігар Азнауран, перадае «Газета.ру».

Паводле яго слоў, у асенне-зімовы перыяд дзеці і дарослыя праводзяць менш часу на вуліцы і даўжэй знаходзяцца ў памяшканнях. Скарачэнне светлавога дня таксама памяншае працягласць знаходжання пры натуральным асвятленні. Па словах спецыяліста, даследаванні выяўляюць сувязь паміж часам на вуліцы і рызыкай развіцця блізарукасці. У асобных назіраннях у дзяцей міяпія больш актыўна прагрэсіравала ў цёмныя месяцы года.

Яшчэ адзін фактар — узрослая нагрузка на зрок зблізку. Дарослыя больш працуюць за камп’ютарамі, а школьнікі праводзяць шмат часу за падручнікамі і хатнімі заданнямі. Урач падкрэсліў, што значэнне мае не столькі выкарыстанне гаджэтаў, колькі працягласць бесперапыннай работы на блізкай адлегласці і захаванне камфортнай дыстанцыі да экрана ці кнігі. Пры гэтым стомленасць вачэй не абавязкова сведчыць аб развіцці блізарукасці — вызначыць прычыну змен можна толькі падчас абследавання.

З пачаткам ацяпляльнага сезона ў памяшканнях змяншаецца вільготнасць. Адначасова падчас работы з экранам чалавек радзей міргае, з-за чаго слёзная плёнка хутчэй выпараецца. Гэта можа выклікаць сухасць, смыленне і перыядычнае затуманьванне зроку, растлумачыў афтальмолаг.

Асабліва ўважліва да зроку дзяцей павінны адносіцца бацькі: дзіця не заўсёды здольнае заўважыць пагаршэнне, паколькі прывыкае да невыразнай карцінкі. Сярод магчымых прыкмет праблемы — звычка жмурыцца, чытаць, падносячы кнігу блізка да твару, садзіцца бліжэй да тэлевізара, дрэнна бачыць напісанае на дошцы або скардзіцца на галаўны боль пасля заняткаў.

Спецыяліст адзначыў, што пры абследаванні важна ацэньваць не толькі вастрыню зроку, але і здольнасць вачэй факусіравацца і працаваць сумесна. Па выніках дыягностыкі ўрач вызначыць, ці патрабуецца дзіцяці карэкцыя, назіранне або лячэнне. Некаторыя парушэнні неабходна выявіць яшчэ ў дзяцінстве, пакуль зрокавая сістэма працягвае развівацца.