У марожанага — пяць груп

Дырэктар холадакамбіната Дзмітрый БОНАХАЎ сустракае групу журналістаў прама каля прахадной свайго прадпрыемства. На нашы пытанні аб лепшым тыпе марожанага ён адказвае, што на смак і колер таварыша няма. Але, у адпаведнасці з тэхнічным рэгламентам, існуе пяць катэгорый марожанага.

Першае — гэта пламбір, у якога тлустасць па малаку ад 12 % і вышэй. Ніжэй 12 % і да 8 % тлустасці адпавядае сметанковаму марозіву. І трэцяя катэгорыя, гэта малочнае марозіва з нізкім утрыманнем малочнага тлушчу. Чацвёртая катэгорыя абагульняе розныя дэсерты: фруктовы лёд, шчарбеты і гэтак далей.

І пятая группа — гэта мяккае марозіва. У яе асобная катэгорыя, таму што вырабляецца яно непасрэдна ў аб’екце грамадскага харчавання. У памяшканні стаіць фрэзер, праз які вам даюць такое марозіва, і вы тут жа яго ўжываеце. Чаму мяккае? Таму што яно не праходзіць працэс загартоўкі, дзе ніжняя тэмпература даходзіць да мінус 27. І ў сувязі з гэтым, яно нібы спецыфічнае, больш далікатнае для языка. Усе гэтыя катэгорыі ў прадпрыемства маюцца, але...

Як яго есці?

Вядучы тэхнолаг фабрыкі марожанага Алена СЫЧОВА расказвае, чаму беларускі ласунак карыстаецца папулярнасцю не толькі ў нашай краіне, але і за яе межамі.

Сакрэт — у тэхналогіях: нашы марожаншчыкі працуюць па рэцэптурах савецкага часу. Аснова — гэта малако неразведзенае пастэрызаванае, малако згушчанае з цукрам, натуральнае масла. У нашага марожанага сапраўды добры, багаты, натуральны склад. І хоць гэта халодны прадукт, папярэдне яго трэба зварыць. Адбываецца гэта ў закрытых устаноўках, якія дазваляюць захоўваць усе карысныя рэчывы. Такі прадукт супакойвае нервовую сістэму і зараджае энергіяй. Даказана, што лактоза (або малочны цукар), якая ўваходзіць у склад малака, станоўча ўплывае на фарміраванне галаўнога мозгу дзяцей і спрыяе павышэнню імунітэту.

Продажы — у сезон і не толькі

Вытворчасць марожанага мае сезоннасць. Яно прадаецца круглы год. Але, напрыклад, «сямейныя» ўпакоўкі — па 250, 400 і больш грам — больш папулярныя зімой.
Улетку вырастаюць продажы ў асноўным марожанага, якое мы ўжываем на хаду («кубачак», ражок, на палачцы). У сувязі з сезоннасцю, вагаюцца прыкладна продажы марожанага ад 250 тон да 1000 тон у месяц. Разбежка ў чатыры разы.

— Таму зімой мы назапашваем марозіва, — тлумачыць дырэктар камбіната. — Летам пры вытворчасці 600–700 тон мы можам прадаваць і тысячу тон, і нават больш. У нас такая ёсць кантрольная дата — 1 мая. Пасля гэтай даты пачынаецца сезон актыўнай рэалізацыі марожанага, які працягваецца да кастрычніка.

Увогуле, на камбінаце наймагутнейшы халадзільнік: пяць паверхаў, агульная ўмяшчальнасць дасягае 12 тысяч тон.

Каля 30 % прадукцыі камбіната ідзе на экспарт у Расію, Кітай, Азербайджан, Грузію, Узбекістан і Арменію. Прадпрыемства актыўна развівае сумесныя праекты. Што датычыцца новых рынкаў, галоўная задача цяпер — не проста адгрузіць адну-дзве партыі, а замацавацца ва Узбекістане і Арменіі, наладзіць стабільныя пастаўкі.

Ад дэгустацыі да серыйнага выпуску

Эксперыментальныя ўзоры новай прадукцыі ацэньвае дэгустацыйная камісія — ставяцца балы за смак, якасць і гэтак далей. Ужо тады тэхнолагі і намеснік па вытворчасці прапрацоўваюць пытанне, на якім абсталяванні вырабляць гэта марозіва.

— У маркетынгу існуе такі творчы падыход: своечасова дагнаць трэнды. Моднае зараз марожанае а-ля дранік нарадзілася, умоўна кажучы, таму што ў нас працуюць «вірлавокія» спецыялісты, — адзначае дырэктар камбіната. — Яны падгледзелі, што наша моладзь з задавальненнем есць бульбу фры ў прыкуску з марожаным і хваліцца гэтым у сацыяльных сетках. Мы падумалі, а ці нельга аб’яднаць несумяшчальныя, здавалася б, смакі ў адным прадукце. І атрымалася — салодкі ласунак «запакавалі» ў вафельны ражок, але зроблены не па класічнай рэцэптуры, а з даданнем бульбы і смажанай цыбулі. Атрымаўся як бы дранік з марожаным-начыннем.

Дарэчы, не ўсім такое сумяшчальніцтва прадуктаў адразу спадабалася. Але тое, што гэта арыгінальна — факт.

Сяргей КУРКАЧ
Фота БелТА