«Ні для каго не сакрэт, што азёры — важнейшы прыродны рэсурс і асноўная крыніца прэснай вады і для чалавека, і для жывёл. Значэнне прэснай вады таксама вельмі складана пераацаніць. Гэта аснова ўсяго. Яна патрэбна і для жыцця чалавека, і для існавання прыродных сістэм, і для сельскай гаспадаркі, і для прамысловасці. Кожнае возера як маленькі сусвет, у якім існуюць спецыфічныя віды раслін і жывёл. Азёры спрыяюць падтрыманню біялагічнага балансу і разнастайнасці, каля азёр паніжаецца агульная тэмпература, а паводкі збіраюцца ў азёрных нізінах», — заўважыла Вольга Няборская.

«Тым не менш існуюць пэўныя пагрозы, звязаныя са змяненнямі клімату. Наша планета — жывы арганізм. Азёры драбнеюць, перасыхаюць, часам, наадварот, узнікаюць новыя. Дзейнасць чалавека наносіць азёрам вельмі вялікую шкоду і ўплывае на флору і фаўну. Гэта скіданне ўгнаенняў і прымяненне хімічных сродкаў у сельскай гаспадарцы, скіданне адходаў у ваду, глабальнае пацяпленне, якое вельмі моцна ўплывае на змяненне ўзроўню вады ў азёрах, тэхнічны прагрэс, што захапляе ўсё больш тэрыторый», — дадала загадчыца сектара.

Выстава прызначана прыцягнуць увагу да прыгажосці, багацця і слабасці азёрных экасістэм, а таксама да неабходнасці іх аховы. Яна пазнаёміць з азёрнымі экасістэмамі нашай планеты, іх станам і выкарыстаннем, а таксама з палітыкай дзяржаў і міжнародных арганізацый, накіраванай на іх ахову і захаванне.

У экспазіцыі — каля 100 дакументаў на рускай, беларускай, англійскай мовах з фондаў бібліятэкі, у тым ліку міжнародныя нацыянальныя прававыя дакументы, прысвечаныя захаванню азёр. Асобным раздзелам прадстаўлена літаратура аб палітыцы нашай дзяржавы ў галіне кіравання і захавання водных рэсурсаў Беларусі.

Экспазіцыя прадоўжыць работу да 20 верасня.