Цырымонія ўручэння ўзнагарод Нацыянальнага конкурсу «Тэлевяршыня» праходзіць у Мінску.

«За мінулыя два гады ў нас дастаткова дасягненняў. З’явіліся тры новыя тэлеканалы: „Першы інфармацыйны“, „СпортТВ“ і „ВаенТВ“. Таксама быў запушчаны відэахостынг Videobel. Мы дамагліся павелічэння аб’ёму беларускага нацыянальнага кантэнту ў эфіры беларускіх тэлеканалаў да 60 %. А калісьці марылі пра 30 %. Ну і ў цэлым у долі тэлепрагляду беларускі кантэнт займае больш за 73 %, — адзначыў Уладзімір Пярцоў. — Мы можам пахваліцца не толькі інфармацыйным, інфармацыйна-аналітычным кантэнтам, якому давяраюць, па апошніх сацдаследаваннях, больш за 85 % нашых грамадзян, але і вялікай колькасцю забаўляльных, музычных праграм, якія палюбіліся нашым тэлегледачам. Яны б’юць рэкорды рэйтынгаў, заваёўваюць сэрцы. У іх з’яўляецца цэлая армія прыхільнікаў. З такімі вяршынямі мы падыходзім сёння да ўручэння статуэтак».

Уладзімір Пярцоў дадаў, што сёння ўнікальны дзень, калі можна адкінуць усе ўмоўнасці і акунуцца ў карпаратыўную супольнасць беларускага тэлебачання. «Кожны забываецца на імгненне, на якім тэлеканале, у якой тэлекампаніі працуе. Усе дружна сустракаюцца, абдымаюцца, абменьваюцца нейкімі ўражаннямі, хваляць адзін аднаго», — сказаў ён.

Цырымонія ўручэння ўзнагарод ХVI Нацыянальнага тэлевізійнага конкурсу «Тэлевяршыня» праходзіць у Мінску. Конкурс «Тэлевяршыня» праводзіцца з 2005 года. Заснавальнікамі выступаюць Міністэрства інфармацыі, Нацыянальная дзяржаўная тэлерадыёкампанія, ЗАТ «Другі нацыянальны тэлеканал» і ЗАТ «Сталічнае тэлебачанне». Усяго на ХVI Нацыянальны тэлевізійны конкурс «Тэлевяршыня» было пададзена 249 заявак. Прафесійнае журы, якое складаецца з аўтарытэтных медыяэкспертаў і прадстаўнікоў ведамстваў, вызначыла пераможцаў і лаўрэатаў у 26 намінацыях.