Беларусь паслядоўна ўмацоўвае свае пазіцыі на сусветнай арэне і ў прыватнасці — на афрыканскім кантыненце. Кіраўніцтва краіны задае вектар узаемадзеяння з замежнымі партнёрамі дзяржаўным органам і арганізацыям рэальнага сектара, а Банк развіцця, у сваю чаргу, стварае для такога супрацоўніцтва фінансавую інфраструктуру і аказвае падтрымку экспартных праектаў, адзначылі ў банку.
У пачатку мая ўвага міжнароднага бізнесу Банка была сканцэнтравана на Егіпце і Судане. Прадстаўнічыя дэлегацыі краін наведалі фінансавы інстытут, каб прадметна абмеркаваць пытанні ўзаемадзеяння і ў найкарацейшыя тэрміны прыступіць да практычнай іх рэалізацыі.
Першы намеснік старшыні праўлення Уладзімір Друшчыц падкрэсліў, што для нашай краіны Егіпет не проста ключавы партнёр у рэгіёне, а стратэгічныя вароты для беларускай прамысловасці на рынкі Афрыкі і Блізкага Усходу.
Бакі абмеркавалі сумесныя інвестыцыйныя праекты, а таксама фінансаванне ўзаемнага гандлю. Банк развіцця гатовы ў поўнай меры выкарыстаць свой патэнцыял для фінансавання экспарту беларускай прадукцыі, работ і паслуг на рынак Егіпта.
Візіт дэлегацыі Рэспублікі Судан — яшчэ адно пацвярджэнне таго, што нават геаграфічная адлегласць не з’яўляецца перашкодай для краін, аб’яднаных жаданнем развіваць эканамічнае супрацоўніцтва.
Выканаўчы дырэктар банка Дзмітрый Меркуль пазначыў высокую цікавасць да нарошчвання ўзаемавыгаднага эканамічнага супрацоўніцтва.
Падчас сустрэчы міністр энергетыкі і нафты Судана Аль-Мутасім Ібрагім Ахмед Алі адзначыў, што іх візіт у Банк развіцця не выпадковы.
— Мы ведаем, што Банк развіцця з’яўляецца апорным інстытутам па фінансавай падтрымцы айчынных вытворцаў і мае вялікі вопыт рэалізацыі розных знешнегандлёвых праектаў. Таму мэта нашай сустрэчы максімальна канкрэтна абмеркаваць найбольш эфектыўныя варыянты супрацоўніцтва і прыступіць да практычнай рэалізацыі паставак беларускай прадукцыі ў Судан, — сказаў госць.
Для практычнай рэалізацыі будучых праектаў сёння створана і прававая аснова. У ходзе пятага пасяджэння Сумеснай Беларуска-Суданскай камісіі па супрацоўніцтве падпісана генеральнае пагадненне паміж урадамі Беларусі і Судана аб прадастаўленні экспартных крэдытаў.
Дакументам прадугледжана магчымасць крэдытавання Банкам развіцця паставак беларускіх тавараў, работ і паслуг у Судан.
Беларускія дасягненні і кампетэнцыі ў агракомплексе, машынабудаванні, энергетыцы, харчовай прамысловасці атрымліваюць высокі попыт на афрыканскім рынку. Наша краіна гатова нарошчваць сваю эканамічную прысутнасць у гэтым рэгіёне, пацвярджаючы сусветнай супольнасці: Беларусь — гэта надзейны партнёр, адкрыты для дыялогу і гатовы да доўгачасовага супрацоўніцтва.
