Першы выезд — у Віцебскі рэгіён. Прадстаўнікі Банка развіцця на чале са старшынёй праўлення Сяргеем Сталярчуком правялі бізнес-інтэнсіў у паўночным рэгіёне. Падтрымалі ініцыятыву фінансавага інстытута дырэктар Нацыянальнага агенцтва па турызме Кірыл Машарскі і кіраўніцтва вобласці.

— Экасістэма Банка развіцця сёння — аll іnclusіve для бізнесу. Нашы магчымасці дазваляюць аказваць эфектыўную падтрымку суб’ектам эканомікі — ад распрацоўкі бізнес-плана да фінансавання. З нядаўняга часу гэта датычыцца і шырокага спектру праектаў у сферы турызму, — растлумачыў Сяргей Сталярчук.

Так, рэсурсы ад 6 % гадавых на тэрмін да 15 гадоў даступныя для будаўніцтва і мадэрнізацыі санаторна-курортных і аздараўленчых цэнтраў, гасцініц, кемпінгаў, глэмпінгаў і іншых падобных аб’ектаў. Атрымаць фінансаванне таксама могуць праекты па кірунках наземных, рачных і паветраных пасажырскіх перавозак, часовага пражывання і харчавання, аховы здароўя і сацыяльных паслуг, творчасці, спорту, забаў і адпачынку.

Пры гэтым для росту турыстычнага патэнцыялу краіны банкам распрацаваны адпаведны крэдытны прадукт для малога і сярэдняга бізнесу. Прадстаўнікі МСП могуць атрымаць фінансаванне для праектаў у галіне гасцінічнага і рэстараннага бізнесу, аховы здароўя (дзейнасць медыцынскіх цэнтраў, санаторна-курортных арганізацый з медыцынскімі паслугамі), спорту, адпачынку, пасажырскіх перавозак, абслугоўвання будынкаў і тэрыторый. Для фінансавання праектаў на тэрыторыі краіны, за выключэннем Мінска, абласных цэнтраў і раёнаў да іх прылеглых, суб’ектам МСП будуць даступныя рэсурсы да 5 мільёнаў рублёў на тэрмін да пяці гадоў з працэнтнай стаўкай пры бягучай стаўцы рэфінансавання да 6,38 % гадавых.

Дыялог атрымаўся прадукцыйным: удзельнікі сустрэчы цікавіліся падтрымкай праектаў ІT-турызму і распрацоўкай праграмнага абсталявання для лічбавізацыі галіны, пазначалі праблемныя пытанні і прапаноўвалі шляхі вырашэння. Як запэўнілі ў банку, падобныя сустрэчы пройдуць і ў іншых рэгіёнах.