Беларус Кірыл Маскевіч перамог на міжнародным турніры па барацьбе памяці Хасана Геміджы і Газанфера Більге ў Турцыі, паведамілі БелТА ў прэс-службе НАК.
На шляху да фіналу ў вагавой катэгорыі да 97 кг у грэка-рымскай барацьбе Кірыл паслядоўна абышоў трох прадстаўнікоў Ірана. У вырашальным паядынку Маскевіч нанёс паражэнне расіяніну Магамеду Муртазаліеву.
Раней золата мемарыяла Геміджы-Більге выйграў наш Павел Глінчук (да 130 кг), а яшчэ адзін беларус Ігар Ярашэвіч (да 87 кг) стаў бронзавым прызёрам спаборніцтваў.
Турнір у Турцыі стаў адным з этапаў падрыхтоўкі да галоўнага старту сезона — чэмпіянату свету па барацьбе 2026 года, які ў канцы кастрычніка прыме сталіца Казахстана Астана.
