Спаборніцкую праграму пятніцы адкрыў жаночы фінал у байдарцы-адзіночцы на 200-метроўцы. Перамогу ў заездзе атрымала Іна Саўчук, якая пераадолела дыстанцыю за 40,523 сек. Другое месца заняла Марыя Місючэнка, якая ў барацьбе за срэбра на адну дзясятую секунды апярэдзіла Аліну Світу. Тытулаваныя Марына Літвінчук і Маргарыта Ткачова сталі 4-й і 6-й адпаведна.

Саўчук узяла ўжо трэцяе золата нацыянальнага першынства — раней прадстаўніца Гродзенскай вобласці была лепшай у адзіночцы на 500-метроўцы і выйграла спрынтарскі фінал у двойцы разам з Уладзіславай Скрыганавай. Таксама ў актыве Іны ёсць адно срэбра.

Далей 11 ліпеня будуць разыграны яшчэ восем камплектаў узнагарод, чэмпіянат Беларусі па веславанні на байдарках і каноэ завершыцца заўтра. Гэты старт з’яўляецца адборачным для ўдзелу ў планетарным форуме 2025 года, які пройдзе ў Мілане напрыканцы жніўня.

Фота з адкрытых крыніц