Беларусь абмеркавала з Венесуэлай магчымае садзейнічанне ў пашырэнні вытворчых магутнасцяў. Гэта стала адной з тэм сустрэчы пасла Беларусі ў Венесуэле Дзмітрыя Дзеравінскага з сектаральным віцэ-прэзідэнтам па пытаннях планавання — міністрам планавання Венесуэлы Рыкарда Хасэ Менендэсам Прыета, паведамляе БелТА.
«Суразмоўцы зверылі гадзіннікі па ключавых пытаннях двухбаковага ўзаемадзеяння, удзяліўшы асаблівую ўвагу магчымасцям садзейнічання ў аднаўленні Венесуэлы пасля нядаўніх землетрасенняў і пашырэнні яе вытворчых магутнасцяў. Абмеркавалі графік беларуска-венесуэльскіх кантактаў і мерапрыемстваў у гэтым годзе», — расказалі ў прэс-службе знешнепалітычнага ведамства.
Асаблівую ўвагу бакі ўдзялілі рабоце па ўзгадненні дарожнай карты супрацоўніцтва паміж Беларуссю і Венесуэлай да 2034 года і змястоўнаму напаўненню парадку дня дзявятага пасяджэння сумеснай камісіі па гандлёва-эканамічным супрацоўніцтве.
