Мы працягваем сачыць за сітуацыяй у Алешках Херсонскай вобласці. І не толькі мы — увесь свет. Хоць, здавалася б, рознае ўжо бачылі, недзе і больш жахлівае. Але, можа, менавіта ў рэжыме цішыні асабліва востра адчуваюцца боль і трагедыя мірных жыхароў невялікага горада, які патрапіў пад жорсткую раздачу... 21 стагоддзе. Гуманітарная катастрофа... Катастрофа чалавечнасці... Добра, што ёсць яшчэ сілы і розум на светлым баку, на якім, дзякуй Богу, і наша родная Беларусь.

Бяспечны калідор

У пятніцу раніцай стала вядома, што пасля начных інжынерных работ расійскія ваенныя завяршылі размініраванне маршруту для дастаўкі гуманітарнай дапамогі, забяспечыўшы бяспечны калідор для канвою з грузам, гатовым да адпраўкі.

— Калі нехта з людзей пажадае пакінуць тэрыторыю, то такая магчымасць таксама арганізавана з захаваннем усіх мер бяспекі. У калоне знаходзяцца 25 аўтобусаў на мінімум 750 месцаў, аўтобусы для ляжачых людзей. Падрыхтавана каля 30 такіх месцаў, плюс едуць дзевяць машын хуткай дапамогі. Акрамя таго, арганізаваны асобны аўтобус для людзей са свойскімі жывёламі.

Людзі маглі пакінуць горад да 14.00 па маскоўскім часе 30 кастрычніка з захаваннем неабходных мер бяспекі. Раздачу гуманітарнай дапамогі было запланавана пачаць пасля 14.30. У гэты ж дзень, як перадае карэспандэнт ТАСС, вялікая калона з гуманітарнай дапамогай накіравалася ў Алешкі, каб даставіць мірнаму насельніцтву ўсё неабходнае, у тым ліку прадукты, сродкі гігіены, медыцынскія прэпараты і паліва — дзясяткі тон гуманітарнай дапамогі. Пры фарміраванні грузу арыентаваліся на просьбы жыхароў — людзям у першую чаргу патрэбны былі прадукты.

Яна Лантратава адзначыла, што ў складзе місіі знаходзяцца больш за 50 спецыялістаў — медыкі, фельчары, гатовыя аказаць неабходную дапамогу. Таксама ў кожным аўтобусе ёсць вада, сухія пайкі, тэрмасы з гарачай гарбатай і ежай.

«Упершыню з 2022 года»

Яна Лантратава пацвердзіла, што рэжым цішыні ў Херсонскай вобласці, які быў аб’яўлены ў сувязі з гуманітарнай місіяй у горадзе Алешкі, захоўваецца, інцыдэнтаў не зафіксавана. Паводле яе слоў, расійскі і ўкраінскі бакі поўнасцю выконваюць узятыя на сябе абавязацельствы.

Упаўнаважаны Вярхоўнай рады Украіны па правах чалавека Дзмітрый ЛУБІНЕЦ таксама адзначыў, што «ні адзін з бакоў ні разу не парушыў рэжым цішыні». Акрамя таго, ён звярнуў увагу на тое, што рэжым цішыні на херсонскім напрамку стаў першым выпадкам з 2022 года, калі Расія і Украіна змаглі рэалізаваць падобнае на вялікім участку фронту і на такі працяглы час.

«Не сумняваўся, што беларусы — побач»

Першы ключавы пункт назначэння — цэнтральная раённая бальніца, якая адчувае крытычны дэфіцыт медыкаментаў і спецыялістаў. Акрамя базавых прадуктаў, мукі, круп і кансерваў, у пацярпелы рэгіён вязуць паліва для генератараў, жыццёва важны інсулін і антыбіётыкі.

Галоўны ўрач Цэнтральнай раённай бальніцы горада Алешкі Уладзімір ХАРЛАН выратаваў тысячы людзей. І, ратуючы іншых, сам трапіў пад абстрэл.

— Дрэнна ідуць справы, таму што няма лекаў, няма прадуктаў харчавання, некаторыя службы абсалютна адсутнічаюць, напрыклад анестэзія. Усяго да дзесяці ўрачоў засталося. Вельмі шмат загінулых людзей — супрацоўнікаў і жыхароў каласальная колькасць, — расказаў ён у эфіры тэлеканала «Першы інфармацыйны».

Пры гэтым Уладзімір Харлан адзначыў, што сочыць за навінамі і не сумняваўся, што беларусы — побач, назваўшы беларускія гарады, дзе жыў і працаваў у свой час: Ружаны, Лунінец, Калінкавічы.

— З Калінкавіч у 1959 годзе мы пераехалі ў Херсон, таму я ведаю і люблю Беларусь. Народ добры, прыгожы, спагадлівы, — дадаў ён.

«Па-сапраўднаму братэрская дапамога»

У горадзе не працуюць крамы, а мясцовыя жыхары, якія засталіся без прадуктаў, вараць суп з пустазелля.

— У Алешках я знаходзіўся да пачатку 2023 года, і там усё вельмі сумна. Пастаянныя абстрэлы, разбурана жыллё, няма ні святла, ні прадуктаў — наогул нічога няма, — расказаў жыхар гэтага горада Арцём КІРОШЫН.

Яшчэ адзін жыхар Алешак Ігар ЖЫТЧАНКА ўдзячны Беларусі за дапамогу ў гуманітарнай місіі.

— Гэта па-сапраўднаму братэрская дапамога. І іншага быць не можа, але мы адзін народ — рускія, украінцы, беларусы. Беларусь сваёй пазіцыяй непахіснасці ўласных абавязацельстваў выклікае павагу на міжнароднай арэне, маю — гэта сто працэнтаў. І пазіцыя вашага Прэзідэнта заслугоўвае павагі. Здымаю капялюш перад Аляксандрам Рыгоравічам.

Мінск аказаў неабходнае ўсебаковае садзейнічанне

Як паведамлялася, беларускі бок афіцыйна далучыўся да гуманітарнай аперацыі ў прыфрантавым горадзе Алешкі на херсонскім напрамку. З аэрапорта Гомеля 29 кастрычніка вылецеў борт з прадстаўнікамі расійскай і ўкраінскай дэлегацый, якія бяруць удзел у аперацыі. Мінск аказвае неабходнае ўсебаковае садзейнічанне Маскве і Кіеву, а таксама выступае гарантам гэтых працэсаў. Поўнае суправаджэнне, бяспека і транспарт забяспечаны прадстаўнікамі Беларусі.

Нагадаем, населены пункт Алешкі размешчаны на левым беразе Дняпра за 5 км ад Херсона. Горад знаходзіцца ў непасрэднай блізкасці ад лініі фронту і на працягу апошніх гадоў рэгулярна трапляў пад абстрэлы. Для правядзення гуманітарнай аперацыі расійскі і ўкраінскі бакі пры пасярэдніцтве ЗША — і перш за ўсё жонкі амерыканскага лідара Меланіі Трамп — дасягнулі пагаднення аб спыненні агню ў раёне населенага пункта. Рэжым цішыні для правядзення гуманітарнай місіі ў Алешках уступіў у сілу з 4.00 па маскоўскім часе 27 кастрычніка і будзе дзейнічаць да 22.59 1 лістапада.

Абышлося без інцыдэнтаў

Гуманітарная місія ў Алешках прайшла без інцыдэнтаў, абодва бакі адзначылі высокую арганізацыю, паведаміла вечарам у пятніцу Яна Лантратава, перадае ТАСС.