Беларусь і Іран абмеркавалі падрыхтоўку дарожнай карты двухбаковага супрацоўніцтва, якая прадугледжвае пашырэнне дзелавых кантактаў, развіццё ўзаемадзеяння паміж прадпрыемствамі і ўмацаванне гандлёва-эканамічных сувязяў. Пра гэта ішла размова на сустрэчы дырэктара Нацыянальнага цэнтра падтрымкі экспарту Мікалая Барысевіча з паслом Ірана ў Беларусі Махсенам Амід-Замані, паведамілі БелТА ў прэс-службе цэнтра.
Бакі таксама абмеркавалі ход рэалізацыі дамоўленасцяў, дасягнутых у ходзе нядаўняй сустрэчы з намеснікам міністра прамысловасці, шахт і гандлю Ірана, кіраўніком арганізацыі па развіцці гандлю Ірана Махамадалі Дэхган-Дэхнаві, а таксама разгледзелі перспектыўныя кірункі актывізацыі беларуска-іранскага дзелавога супрацоўніцтва.
Асобная ўвага была ўдзелена развіццю прамых кантактаў паміж прадстаўнікамі дзелавых колаў дзвюх краін. Нацыянальны Цэнтр падтрымкі экспарту пацвердзіў гатоўнасць аказаць садзейнічанне ў арганізацыі дзелавых сустрэч для іранскай дэлегацыі, чаканай у Беларусі ў бліжэйшы час.
