«Калужская вобласць — важны гандлёва-эканамічны партнёр для нашай краіны. Па выніках 2025 года рэгіён заняў 14-е месца па аб’ёме тавараабароту сярод усіх суб’ектаў Расійскай Федэрацыі, які склаў больш як $700 млн, — адзначыў Аляксандр Церахаў. — Наша бліжэйшая агульная стратэгічная задача — задзейнічаўшы ўвесь патэнцыял, імкнуцца да $1 млрд (тавараабароту. — Заўвага БелТА). Перакананы, што гэта планка стане для нас не проста лічбай, а трывалым фундаментам для пераходу на прынцыпова новы ўзровень эканамічнай інтэграцыі».

Асобна намеснік прэм’ер-міністра спыніўся на ўзаемадзеянні ў будаўнічым сектары. Беларускія будаўнікі шмат гадоў паспяхова ўзводзяць у Калужскай вобласці не толькі жылыя кварталы, але і сучасныя школы, дзіцячыя сады.

«Мы шчыра даражым гэтым найвышэйшым узроўнем даверу з боку кіраўніцтва і жыхароў рэгіёна. Беларускі бок гатовы і далей прымаць актыўны ўдзел ва ўзвядзенні аб’ектаў рознага прызначэння, гарантуючы высокую якасць і строгае выкананне тэрмінаў», — падкрэсліў Аляксандр Церахаў.

РУП «Белбудцэнтр» вызначаны аператарам, адказным за рэалізацыю сацыяльных праектаў у Бораўску і Обнінску, дзе будуюцца школа і дзіцячы сад на 260 месцаў.

Магутны імпульс атрымлівае і супрацоўніцтва ў аграпрамысловым комплексе. Адна з перспектыўных кропак эканамічнага росту — вытворчасць аградронаў.

«Укараненне такіх тэхналогій дасць магчымасць не толькі павялічыць ураджаі ў сельскай гаспадарцы і праводзіць маніторынг лясных масіваў, аб’ектаў інфраструктуры, але і закладзе аснову для пашырэння прамысловай кааперацыі», — сказаў Аляксандр Церахаў.

Разглядаецца рэалізацыя яшчэ аднаго ключавога праекта — будаўніцтва малочнатаварнага комплексу на 1400 галоў з устаноўкай інавацыйнага даільнага абсталявання ААТ «Гомельагракамплект». Узаемавыгаднай сферай павінна стаць і сумесная работа Нацыянальнай акадэміі навук Беларусі і Калужскай вобласці па развіцці птушкагадоўчай генетыкі, асабліва ў галіне селекцыі яечных парод і вывядзення высокапрадукцыйных гібрыдаў птушкі.

«Гэта дасць магчымасць не толькі знізіць залежнасць ад імпарту племяннога матэрыялу і гарантаваць харчовую бяспеку, але і ажыццявіць пераход ад базавай гадоўлі птушкі да інавацыйнага аграбізнесу, вывесці вытворчасць на ўзровень сусветных стандартаў», — адзначыў намеснік прэм’ер-міністра.

Паводле яго слоў, заслугоўвае ўвагі і кааперацыйнае супрацоўніцтва паміж Мінскім аўтамабільным заводам і «Меркатар Холдынг» — яскравы прыклад паспяховай беларуска-расійскай прамысловай інтэграцыі ў рамках Саюзнай дзяржавы.

«Выказваем гатоўнасць да маштабавання такога партнёрства за кошт нарошчвання ўзроўню лакалізацыі, павышэння якасці абслугоўвання тэхнікі», — дадаў Аляксандр Церахаў.

Акрамя таго, на сустрэчы абмяркоўвалася пытанне аб пастаўках розных відаў тэхнікі для патрэб Калужскай вобласці. Беларускія машынабудаўнікі гатовы прапанаваць комплексныя рашэнні як па абнаўленні гарадскога рухомага саставу сучасным пасажырскім транспартам, так і па маштабных пастаўках шырокай лінейкі сельскагаспадарчай і спецыяльнай тэхнікі.

«Прымяненне гібкіх фінансавых інструментаў і спецыялізаваных лізінгавых праграм дасць магчымасць вашаму рэгіёну зрабіць планавую закупку неабходнай тэхнікі з мінімальнай аднаразовай нагрузкай на бюджэт, атрымаўшы пры гэтым гарантаванае сэрвіснае суправаджэнне», — адзначыў Аляксандр Церахаў.

Таксама Беларусь можа прапанаваць і варыянты супрацоўніцтва ў сферах водападрыхтоўкі, водаачысткі, будаўніцтва, рэканструкцыі аўтамабільных дарог. У рэгіёне добра ведаюць флагманаў у гэтых напрамках. Так, прадпрыемства «Палімерканструкцыя» ўжо рэалізавала праект на тэрыторыі вобласці. «Можам прапанаваць іншыя формы супрацоўніцтва з прыцягненнем арганізацый водазабеспячэння, водаадвядзення, якія маюць таксама свае тэхналогіі», — адзначыў Аляксандр Церахаў.

Акрамя таго, Беларусь прапануе разгледзець магчымасць выкарыстання ў Калужскай вобласці вопыту беларускіх інстытутаў па распрацоўцы дарожна-будаўнічай праектнай дакументацыі.

Яшчэ адзін важны напрамак — гуманітарнае супрацоўніцтва. «Правядзенне сумесных культурных мерапрыемстваў надае дадатковую каштоўнасць умацаванню дружбы паміж Рэспублікай Беларусь і Калужскай вобласцю», — падкрэсліў Аляксандр Церахаў.

Напярэдадні ў Беларускай дзяржаўнай філармоніі адбыўся канцэрт з удзелам «Імперскага Рускага Балета», салістаў Калужскай абласной філармоніі і сімфанічнага аркестра імя Рыхтэра. Намеснік прэм’ер-міністра выказаў удзячнасць за правядзенне такога знакавага культурнага мерапрыемства ў Мінску.

«Мы шырока адчыняем дзверы для ўсіх жыхароў Калужскай вобласці, Беларусь — краіна з цікавай гісторыяй, багатымі традыцыямі, цудоўнай прыродай, дзіўнай архітэктурай. І гэта толькі частка напрамкаў, па якіх мы гатовы развіваць доўгатэрміновае партнёрства. Адкрыты для абмеркавання і іншыя напрамкі, якія цікавяць вас і вашых калег. Упэўнены, што ваш візіт будзе прадукцыйным, прадметным і ўнясе істотны ўклад у далейшае развіццё двухбаковых адносін», — падкрэсліў Аляксандр Церахаў.