У другі дзень візіту Максім Рыжанкоў сустрэўся з дзяржаўным міністрам па пытаннях планавання і інвестыцый у Адміністрацыі Прэзідэнта Аб’яднанай Рэспублікі Танзанія Кіцілам Аляксандрам Мкумбам. 

Бакі абмеркавалі шырокі спектр пытанняў развіцця эканамічнага супрацоўніцтва з акцэнтам на рэалізацыю праектаў у сферах механізацыі сельскай гаспадаркі, забеспячэння харчовай бяспекі, паставак пажарнай тэхнікі і абсталявання беларускай вытворчасці.

Максім Рыжанкоў адзначыў, што Беларусь разглядае Танзанію як свайго стратэгічнага партнёра не толькі ў кантэксце развіцця двухбаковых гандлёва-эканамічных сувязяў, але таксама як пляцоўку для выхаду беларускіх і сумесна вырабленых тавараў на рынкі краін Усходняй і Паўднёвай Афрыкі.

Для выпрацоўкі новых праектаў у гандлёва-эканамічнай сферы і якаснай адпрацоўкі ўжо намечаных напрамкаў супрацоўніцтва падпісана міжурадавае пагадненне аб заснаванні сумеснага камітэта па гандлі і эканамічным супрацоўніцтве. Бакі дамовіліся аб пашырэнні дагаворна-прававой базы ў пытаннях садзейнічання ўзаемным інвестыцыям, мытнага супрацоўніцтва і спрашчэння візавага рэжыму.

Дасягнута дамоўленасць аб накіраванні танзанійскай дэлегацыі з прадстаўнікоў сельскай гаспадаркі, дзелавых колаў, у тым ліку членаў Федэрацыі прыватнага сектара Танзаніі, у Мінск на выставу «Белагра-2026». 

У гэты ж дзень Максім Рыжанкоў наведаў адну з вядучых свабодных эканамічных зон Танзаніі — Бенджаміна Мкапы, дзе правёў перагаворы з яе кіраўніцтвам, абмеркаваў перспектывы выкарыстання свабодных эканамічных зон Танзаніі для размяшчэння сумесных вытворчасцяў, прызначаных у тым ліку для экспарту вырабленай прадукцыі ў трэція краіны. 

У гэтых жа мэтах кіраўнік беларускага знешнепалітычнага ведамства азнаёміўся з інфраструктурай і асаблівасцямі функцыянавання марскога порта ў горадзе Дар-эс-Салам, які з’яўляецца адным з найбуйнейшых гандлёвых партоў Усходняй Афрыкі. Тавары, якія перавальваюцца з дадзенага порта, ідуць у Аўстралію, Азію, ЗША, а таксама афрыканскія краіны. 

Падчас перагавораў бакі абмеркавалі пытанні стварэння ўмоў для бесперабойных паставак айчынных тавараў праз танзанійскія парты, у тым ліку выкарыстання іх магчымасцяў для перавалкі беларускіх мінеральных угнаенняў і арганізацыі вытворчасці змешаных угнаенняў. З улікам членства Танзаніі ва Усходнеафрыканскай супольнасці выкарыстанне порта дазволіць арганізаваць пастаўкі беларускіх тавараў у краіны Афрыканскага кантынента.