Працягваецца азнаямленчы тур па Беларусі кітайскіх блогераў-мільённікаў. Пачалося падарожжа з Гомельскай вобласці, дзе госці з Кітая наведалі Нацыянальны парк «Прыпяцкі» і прайшлі па пяцікіламетровай экалагічнай сцежцы па верхавых балотах і маляўнічых лясах, каб убачыць унікальныя палескія пейзажы і даведацца пра багатую флору і фауну. Таксама блогеры з мільённай аўдыторыяй наведалі Нацыянальны гісторыка-культурны музей-запаведнік «Нясвіж», здзейснілі экскурсію па Мірскім замку. Адбылося знаёмства з Гроднам, яго ключавымі славутасцямі, а таксама наваколлем горада з унікальнай прыродай і архітэктурай. Так, напрыклад, сёння госці з Кітая наведваюць Аўгустоўскі канал — выдатнае гідратэхнічнае збудаванне першай паловы XIX стагоддзя і сапраўдны шэдэўр інжынернай думкі, які па праве называюць жамчужынай Прынёманскага краю. Таксама блогеры пабываюць у палацава-паркавым комплексе «Вялікі Свяцк Валовічаў».

Уражанняў па выніках некалькіх дзён у Беларусі ў дзесяці вядучых кітайскіх трэвел-блогераў маса. Яны расказваюць, што краіна здзівіла і пакарыла іх гасціннасцю, смакам беларускіх страў, а таксама ўнікальнымі месцамі, якія ім удалося наведаць.

«Я наведала вельмі шмат еўрапейскіх краін, але Беларусь магу аднесці да першай дзясяткі. Напрыклад, у горадзе Гродне адкрываюцца вельмі прыгожыя пейзажы, у вас вельмі прыгожыя замкі, храмы, цэрквы. Гродна — вельмі чысты горад, і калі крыху больш паглыбіцца, то мне падабаецца, што ў вас глыбокі сэнс закладзены ў многіх рэчах», — сказала Сюань Тан, дадаўшы, што беларусы і жыхары Гродзенскага рэгіёна ў прыватнасці вельмі добразычлівыя і спагадлівыя ў адносінах да гасцей.

Блогерка падзялілася, што да прыезду ў Беларусь мала ведала пра краіну, і ўбачанае яе ўразіла. «Насамрэч, колькасць інфармацыі пра вашу краіну была абмежаваная, я мала ведала. Але я ведаю, што кітайскія студэнты сюды прыязджаюць вучыцца, — сказала яна. — Тут мы ўбачылі вельмі прыгожыя будынкі, мы пракаціліся на вузкакалейцы — для нас гэта вельмі цікава».

«Думаю, што ўсе славутасці Беларусі будуць заахвочваць кітайскіх турыстаў прыязджаць да вас і даведвацца пра вашу краіну», — дапоўніла Сюань Тан, падкрэсліўшы, што абавязкова падзеліцца ўбачаным у сваіх акаўнтах на тэму турызму і падарожжаў, якія яна вядзе ў TikTok.

Азнаямленчы тур для відэаблогераў стартаваў 7 верасня. Арганізатарамі выступілі Нацыянальнае агенцтва па турызме пры падтрымцы пасольства Беларусі ў КНР і ААТ «ААБ «Беларусбанк».

Нацагенцтва па турызме падрыхтавала для кітайскіх блогераў насычаную тыднёвую праграму, якая ў будучыні можа легчы ў аснову новага турыстычнага прадукту.
Блогер-тур для лідараў меркаванняў з Кітая — першы буйны праект Нацыянальнага агенцтва па турызме па прасоўванні турыстычнага патэнцыялу Беларусі за мяжой і прыцягненні замежных падарожнікаў. У найбліжэйшы час аналагічныя туры запланаваны і для прадстаўнікоў іншых дружалюбных краін.